Էդուարդ Շարմազանովը կադրային վերջին փոփոխությունների մասին

<Կարեւորը անունները չեն` կլինեն պաշտոնում, թե չեն լինի: Նախագահը շատ հստակ ներկայացրեց իշխանության փիլիսոփայությունը` որեւէ անբարեխիղճ պաշտոնյա, ով իրեն օրենքից բարձր կպահի, չպետք է տեղ ունենա պետական համակարգում: Եթե կլինեն այդպիսիք, բնականաբար չեն աշխատի>,-նախորդ շաբաթվա նշանակումների հետ կապված, հայտարարել է ՀՀԿ մամուլի քարտուղար, ԱԺ պատգամավոր Էդուարդ Շարմազանովը:

Պատասխանելով ԵՐԿԻՐ-ի թղթակցի հարցին` ինչ հիմնավորումներով է առաջնորդվել իշխող կուսակցությունը`կադրային վերջին փոփոխություններն իրականացնելիս, ՀՀԿ մամուլի քարտուղար Էդուարդ Շարմազանովը պատասխանեց. <Էկոնոմիկայի նախարարի հետ կապված կարող եմ միայն ասել, որ Ներսես Երիցյանը ոչ թե հեռացվել է, այլ նույն ոլորտում կտեղափոխվի այլ աշխատանքի, ուր եւս կօգտագործի իր ունակությունները: Իսկ թե ինչու են կանգ առել հենց Տիգրան Դավթյանի վրա, ապա վարչապետը շատ հստակ ներկայացրեց, որ Տիգրան Դավթյանը երկար ժամանակ եղել է այդ ոլորտում փոխնախարար, պրոֆեսիոնալ է, եւ կարծում եմ`շատ նորմալ է, որ նա հաստատվել է այդ պաշտոնում>:

Ինչ վերաբերում է ֆինանսների նորանշանակ նախարար Վաչե Գաբրիելյանին, ապա Շարմազանովի համոզմամբ, Գաբրիելյանը ֆինանսական ոլորտի արհեստավարժներից է, եւ նրա այս թեկնածությունն ընդունելի է գոնե արհեստավարժների ու այն մարդկանց համար, ովքեր աշխատում են այդ ոլորտում: