Վահրամ Ներսիսյանցը` Համահայկական բանկի գործադիր տնօրեն

Այսօր կառավարությունում ստորագրվել է աշխատանքային պայմանագիր` Վահրամ Ներսիսյանցին «Համահայկական բանկ» ԲԲԸ-ի գործադիր տնօրեն նշանակելու վերաբերյալ:

Աշխատանքային պայմանագիրն ստորագրել են ՀՀ վարչապետ, «Համահայկական բանկ» ԲԲԸ-ի խորհրդի նախագահ Տիգրան Սարգսյանը եւ ՀՀ Նախագահի տնտեսական հարցերով գլխավոր խորհրդական Վահրամ Ներսիսյանցը:

Պայմանագրի ստորագրմանը հաջորդած մամուլի ասուլիսում Վահրամ Ներսիսյանցը պարզաբանումներ է տվել Համահայկական բանկի գործունեության եւ նպատակների վերաբերյալ:

Նա նշել է, որ Համահայկական բանկ առեւտրային բանկ չէ եւ նախատեսում է երկարաժամկետ ներդրումներ արտահանումը եւ ներկրումը խթանող կազմակերպություններում, որոնք ապահովելու են մրցունակություն համաշխարհային շուկայում: Ներսիսյանցի խոսքով, բանկի հետագա ծրագրերում նախատեսվում է վարկերի եւ ներդրումների ձեւով կիրառել նաեւ Սփյուռքում:

Վահրամ Ներսիսյանցը նշել է,  որ Համահայկական բանկի կանոնադրական կապիտալը 100 մլն դոլար է, որից 20 մլն տրամադրվել է պետության կողմից, իսկ մնացածը լրացվելու է միջազգային ֆինանսական կազմակերպություններից կամ այլ մասնավոր աղբյուրներից:

Բանկի գործունեության առաջնահերթություններից կլինեն տեղեկատվական տեխնոլոգիաների, բժշկական, կրթական եւ տուրիստական ոլորտները: