«Հանքի շահագործման հեռանկարը բազմաթիվ հարցեր է առաջացնում»․ «Ամուլսարն՝ առանց հանքի» նախաձեռնությունը քննարկում կանցկացնի

«Ամուլսարն առանց հանքի» քաղաքացիական նախաձեռնությունը հանրային քննարկում է կազմակերպելու՝ հերթական անգամ վեր հանելու Ամուլսարի ոսկու հանքի շահագործման հետևանքները։

Քննարկումն ակտիվիստները կազմակերպելու են հոկտեմբերի 17-ին՝ ժամը 18:00-ին, Կոնսերվատորիայի այգում՝ Կոմիտասի արձանի հարևանությամբ։

«Ամուլսարի հարցը շարունակում է մնալ Հայաստանի բնապահպանական և հանրային նշանակության կարևորագույն խնդիրներից մեկը։ Հանքի շահագործման հեռանկարը բազմաթիվ հարցեր է առաջացնում՝ կապված ջրային ռեսուրսների, կենսաբազմազանության, շրջակա միջավայրի և ազդակիր համայնքների ապագայի հետ։

Այս իրավիճակում կարևոր ենք համարում համախմբվել, քննարկել առկա խնդիրները, լսել տարբեր մասնագիտական կարծիքներ և միասին հասկանալ, թե ինչ քայլեր են անհրաժեշտ հետագա անելիքները որոշելու համար։

Հանրային քննարկման նպատակն է նպաստել Ամուլսարի խնդրի շուրջ հանրային երկխոսությանը, բարձրաձայնել բնապահպանական մտահոգությունները և քննարկել հանքի շահագործման հետ կապված ռիսկերն ու դրանց հնարավոր հետևանքները»,- նշել են քաղաքացիական նախաձեռնությունից։