Մինչև հոկտեմբեր պետք է հանքի հետ կապված ամեն մի դետալ հստակեցվի և վերացվի հանքի շրջափակումը. մանրամասներ ՔՊ նիստից. «Փաստ»

«Նախօրեին տեղի ունեցավ «Քաղաքացիական պայմանագիր» կուսակցության վարչության հերթական նիստը, որին մասնակցել է նաև վարչապետ Նիկոլ Փաշինյանը։ Հանդիպման մասին որոշ տեղեկություններ արդեն հրապարակվել են:

«Փաստ» թերթին այս հանդիպման հետ կապված հետաքրքիր մանրամասներ են հայտնի դարձել։ Մասնավորապես, թերթի աղբյուրի փոխանցմամբ՝ Փաշինյանը հիմնականում խոսել է ուժայինների հրաժարականների մասին, սակայն առանձնապես մանրամասներ չի ներկայացրել, ուղղակի հայտարարել է որ «այս փուլում ունենք նման օրակարգ, փակագծերը չեմ կարող բացել»։

Նիստի ընթացքում առանձին անդրադարձ է եղել Ամուլսարի հանքի շահագործմանը, վարչապետն ասել է, որ մինչև հոկտեմբեր պետք է հանքի հետ կապված ամեն մի դետալ հստակեցվի և վերացվի հանքի շրջափակումը։

Նիստի վերջում նա հորդորել է ԱԺ-ում ավելի ակտիվ գործունեություն ծավալել, քանի որ «առաջիկայում թեմաներն ավելի են ծանրանալու»։ 

Թերթի աղբյուրն ասել է նաև, որ հոկտեմբերի առաջին տասնօրյակում նախատեսվում է անցկացնել ԱԺ ևս մի արտահերթ, որի ընթացքում երկրորդ ընթերցմամբ կընդունվի և օրենքի ուժ կստանա արդեն առաջին ընթերցում անցած «Ազգային անվտանգության մարմիններում ծառայության մասին» ՀՀ օրենքում փոփոխություններ կատարելու մասին և «Ոստիկանությունում ծառայության մասին» ՀՀ օրենքում փոփոխություններ կատարելու մասին նախագծերը»,-գրում է թերթը:

Մանրամասները՝ թերթի այսօրվա համարում: