Քաղաքապետարանում Ավինյանի գլխավորությամբ քննարկում են Նոր Նորքի թաղապետարանում տեղի ունեցածը. «Հրապարակ»

Նոր Նորքի թաղապետ Տիգրան Տեր-Մարգարյանի մասնակցությամբ թաղապետարանում տեղի ունեցած խմբակային ծեծի փաստով Երևանի քաղաքապետարանում Տիգրան Ավինյանի մասնակցությամբ քննարկում է տեղի ունենում ավագանու անդամների հետ։ Տեղեկությունը «Հրապարակ»-ին փոխանցել են Երևանի քաղաքապետարանի լրատվականից։

Հիշեցնենք, որ Նոր Նորքի վարչական շրջանի ղեկավար, Արամ Զավենի Սարգսյանի «Հանրապետություն» կուսակցության անդամ Տիգրան Տեր-Մարգարյանը և իր աշխատակիցները թաղապետարանի շենքում այսօր ուղիղ եթերում դաժանաբար ծեծի են ենթարկել ակտիվիստ, հանրային գործիչ Արթուր Չախոյանին։ Վերջինս գնացել էր մասնակցելու հանրային լսումների և վարչական շրջանի ղեկավարից պատասխան պահանջելու նախորդ օրը հրապարակայնորեն իրեն և իր ընտանիքին վիրավորելու համար։ 

Ավելի ուշ Չախոյանին բերման են ենթարկել, նա ոստիկանական բաժնից շտապօգնության մեքենայով տեղափոխվել է հիվանդանոց: