«Հանգստացրեք նրան, նա կկործանի երկիրը»․ Լուկաշենկոն զգուշացնում է ՀՀ-ին

Նիկոլ Փաշինյանը Եվրամիության հետ սիրախաղով կործանում է Հայաստանը։ Նման կարծիք է հայտնել Բելառուսի նախագահ Ալեքսանդր Լուկաշենկոն։ Նա հորդորել է հանգստացնել Փաշինյանին հակառակ դեպքում նա կործանում է երկիրը։

«Կատարվածի մեղավորը Հայաստանի ղեկավարությունն է, միայն նրանք», - ասել է Լուկաշենկոն՝ հավելելով, որ ինքը և Ռուսաստանի ղեկավարը զարմացած էին Փաշինյանի՝ Լեռնային Ղարաբաղը որպես ադրբեջանական տարածք ճանաչելու հայտարարությունից։ «Լսեք, ես և Պուտինը ապշած էինք, Պուտինն ասում է. «Ինչո՞ւ նա ասաց. Նրան ոչ ոք չի ստիպել դա անել». Փաշինյանն ինքը հրաժարվեց Լեռնային Ղարաբաղից։ Թեև այդ պահին Իլհամը պատրաստ էր համաձայնել, որ սա տարածք է, որտեղ Հայաստանը լուրջ ազդեցություն կունենա։ Բայց ահա այսպիսի նվեր։ Ո՞վ չէր օգտվի», - ասել է Լուկաշենկոն։

Նախագահը հիշեցրել է, որ ժամանակին իրականում միջնորդական գործառույթ է իրականացրել Ադրբեջանի և Հայաստանի ղեկավարների միջև՝ փորձելով նպաստել տարածքային վեճի խաղաղ կարգավորմանը։ Իսկ Ադրբեջանի նախագահ Իլհամ Ալիեւը պրագմատիկ դիրքորոշում է ընդունել՝ առաջարկելով տնտեսական համագործակցություն և ներդրումներ։

«Ալիևն անգամ Հայաստանի հետ կռվելու նպատակ չի ունեցել», - ասել է Բելառուսի ղեկավարը։

Նա նաև մեկնաբանել է հայկական կողմի մեղադրանքները, թե Մինսկը աջակցել է Բաքվին Լեռնային Ղարաբաղի հակամարտության ժամանակ։

«Նրանք ինձնից վիրավորված են, քանի որ ես Ադրբեջանին եմ աջակցել, Աստված ձեզ հետ, ես միշտ սատարել եմ ողջախոհությունը, ես կողմ եմ եղել, որ պատերազմ չլինի, մենք իրար հետ չկռվենք»,- նշել է Լուկաշենկոն։

Մեղադրանքներից հետո Փաշինյանն ասել էր, ոչ ինքը, ոչ էլ որևէ այլ հայ պաշտոնյա չի մեկնի Բելառուս, քանի դեռ երկիրը ղեկավարում է Ալեքսանդր Լուկաշենկոն։

Բացի այդ, հիշենք, որ Հայաստանի և Բելառուսի ղեկավարները վեճի մեջ էին մտել ԵԱՏՄ գագաթնաժողովում։ Հակամարտությունը սկսվեց այն բանից հետո, երբ Նիկոլ Փաշինյանը նախապես հայտարարեց, որ հայկական պատվիրակությունը մասնակցելու է հաջորդ մայիսին Մինսկում կայանալիք Եվրասիական տնտեսական բարձրագույն խորհրդի նիստին, բայց հեռավար ձևաչափով ՝ տեսակապի միջոցով։