Ադրբեջանի կրակոցները «աննպատակ» ներկայացնելով՝ թույլ չեն տալիս, որ միջազգային պատշաճ գնահատական լինի․ ադրբեջանագետ

Ադրբեջանագետ Տաթևիկ Հայրապետյանը գրում է․

«Ամբողջ իշխանական քարոզչամեքենան՝ ՔՊ պատգամավորներով, փորձագետներով, կայքերով լծվել են Ադրբեջանին մաքրելու, կրակոցները «անկարևոր ու աննպատակ» դարձնելու գործին։

Ինչո՞ւ, որովհետև ակնհայտ կոլաբորանտներ են․ իրենց ավելի ձեռնտու է Ալիևին «խաղաղության մրցանակի» առաջադրել, քան ընդունել, որ ագրեսիան արդարացնելու, միակողմանի զիջումների, Արցախը Ադրբեջանին հանձնելու ու դրա դիմաց ոչինչ չստանալու «խաղաղության» իրենց օրակարգը տապալվել է։

Օրակարգ երբեք էլ չի եղել, եղել է Բաքվի երազանքների ցուցակ, որոնք ՀՀ իշխանությունները հստակորեն իրագործել են 2021-2022 թվականներից ի վեր՝ իշխանության պահպանման նպատակով։ Հենց դա էլ կոլաբորացիոնիզմն է, որի մասին ցավալիորեն բազմաթիվ փաստեր կան։

Ադրբեջանը գործում է շատ հստակ ու թիրախային, շարունակում է լարված պահել սահմանային իրավիճակը, տարածել ապատեղեկատվություն, վարել տեղեկատվական պատերազմ մեր հանրության դեմ։ Դրան կարելի է դիմակայել թե՛ միջազգային, թե՛ քաղաքական, թե՛ ռազմական ու թե՛ դիվանագիտական գործիքակազմերով։

Ադրբեջանական կրակոցները «աննպատակ» ներկայացնելով՝ իշխանությունները թույլ չեն տալիս անգամ, որ միջազգային պատշաճ գնահատականներ լինեն Ադրբեջանի վարքի հետ կապված։ Այո ո՞ր պետությունը պետք է մեզանից շատ ցանկանա պաշտպանել մեր շահերը։ Ոչ մի։ Իսկ եթե մենք որդեգրենք այլ քաղաքականություն, որտեղ կա որոշում դիմակայելու, այդ դեպքում կհայտնվեն բազմաթիվ դաշնակիցներ»։