Ձնամաքրման աշխատանքները խայտառակ թերի կերպով են իրականացվում, որոշ ճանապարհներ ընդհանրապես չեն մաքրվում․ Գառնիկ Դանիելյան

Ամբողջ հանրապետությունում ձնամաքրման աշխատանքները խայտառակ թերի կերպով են իրականացվում, որոշ ճանապարհներ ընդհանրապես չեն մաքրվում։ Այս մասին գրում է ՀՀ ԱԺ «Հայաստան» խմբակցության պատգամավոր, ՀՅԴ Տավուշի Մարզային կոմիտեի ներկայացուցիչ Գառնիկ Դանիելյանը։

«Այսօր կառավարության հերթական նիստի ժամանակ քննարկվեց ճանապարհների որակի և մաքրման աշխատանքների հարցը։

Տարածքային կառավարման և ենթակառուցվածքների նախարար Գնել Սանոսյանը փորձեց արդարանալ, թե՝ հիմա տեխնիկան աղը ընդհանուր է լցնում, ու մարդիկ ասում են՝ ցանված չէ։

Ըստ Սանոսյանի՝ առաջ բահերով էին լցնում, իսկ այժմ՝ նոր տեխնիկաներ են գործածվում։

Այս խոսքերը չեն համապատասխանում իրականությանը։

Օրերս՝ ԱԺ-ում, հարցուպատասխանի ժամանակ, հնչեցրի հարցեր, որոնք վերաբերում էին ճանապարհների ձմեռային սպասարկման աշխատանքների խայտառակ ցածր որակին։

Բարձրաձայնեցի նաև, որ ճանապարհների մաքրման աշխատանքներին ներգրավված են 30-40 տարվա հնության մեքենաներ, չնայած այն հանգամանքին, որ կա Կառավարության 1826 - Ն որոշում, որի համաձայն ճանապարհների սպասարկման աշխատանքներում պետք է ներգրավվեն միայն 15 և ավելի փոքր տարիք ունեցող մեքենաներ։

Ամբողջ հանրապետությունում ձնամաքրման աշխատանքները խայտառակ թերի կերպով են իրականացնում։ Շատ ճանապարհներ ընդհանրապես չեն մաքրվում։

Ողջ համացանցը ողողված է քաղաքացիների կողմից նկարահանված տեսանյութերով, թե ինչպես են տրանսպորտային միջոցները երթևեկում սարսափելի վտանգավոր պայմաններում։

Տեսանյութը՝ համացանցից»։