Բոլորը պատրա՞ստ են․ Միշուստինը ԱՊՀ երկրների գործընկերների հետ այցելել է շոկոլադի գործարան

ԱՊՀ երկրների ներկայացուցիչները մեկնել են Մոսկվա՝ մասնակցելու ԱՊՀ կառավարությունների ղեկավարների խորհրդի նիստի միջոցառումներին:

ՌԴ վարչապետ Միխայիլ Միշուստինը Հայաստանի, Ադրբեջանի, Բելառուսի, Ղազախստանի, Ղրղզստանի, Տաջիկստանի, Թուրքմենստանի և Ուզբեկստանի պատվիրակությունների ղեկավարների հետ այցելել է «Միացյալ հրուշակագործներ» հոլդինգ:

Նրանց ուղեկցել են ԱՊՀ երկրներից Ռուսաստան տեղափոխված երեխաները։ Միշուստինը դպրոցականներից հետաքրքրվել է` ամեն ինչ նորմա՞լ է, իսկ նրանցից մեկին հայերեն հարցրել է` ո՞նց ես։

«Դե ինչ, բոլորը պատրա՞ստ են։ Գնացինք»,- ասել է Միշուստինը՝ բռնելով Աստրախանից եկած 8 տարեկան Սնեժանայի ձեռքը։ Աղջիկը «Ցանկությունների տոնածառ» ակցիայի մասնակից է, և շոկոլադի գործարան այցելելը նրա երազանքն է եղել։

Երեխաները շրջել են արտադրամասերով, տեսել, թե ինչպես են արտադրվում ռուսական ամենահայտնի «Мишка косолапый», «Аленка» և «Птичье молоко» կոնֆետները։ Հյուրերը կարողացել են կոնֆետներ համտեսել անմիջապես հոսքագծի մոտ։ Այդ հարցում նրանց օգնել է կառավարության ղեկավարը՝ քաղցրավենիք բաժանելով ամենափոքրերին:

Շրջայցից հետո երեխաները, նրանց ծնողներն ու պատվիրակությունների ղեկավարները տոնական թեյախմության են մասնակցել։

«Իրականում սա մանկության, տոնի համն է։ Ես ուզում եմ սրտանց շնորհավորել ձեզ գալիք տոնի կապակցությամբ, շնորհավոր Նոր տարի․.. Հյուրասիրվեք, այս ամենը ձեզ համար է», - դիմել է Միշուստինը երեխաներին։

Նա նաև խորհուրդ է տվել ամրապնդել բարեկամական հարաբերությունները այնպես, ինչպես դրանք ամրապնդվում են ԱՊՀ տարածքում։

«Միացյալ հրուշակագործները» ռուսական հոլդինգ է, որը միավորում է 16 ձեռնարկություն, այդ թվում` հանրահայտ «Կրասնի Օկտյաբր», «Բաբաևսկի հրուշակեղենի կոնցեռն», «Ռոտ Ֆրոնտ» գործարանները։ Հոլդինգի գործարանները արտադրում են ավելի քան 3,5 հազար անուն հրուշակեղեն, արտադրության ծավալները կազմում են տարեկան ավելի քան 360 հազար տոննա: