Հայաստանը Միջազգային քրեական դատարանի լիիրավ անդամ կդառնա փետրվարի 1-ին

Հաջորդ տարվա փետրվարի 1-ից Հայաստանը պաշտոնապես կդառնա Միջազգային քրեական դատարանի (ՄՔԴ) անդամ։

«2023 թվականի նոյեմբերի 14-ին Հայաստանի Հանրապետությունը պաշտոնապես ի պահ է հանձնել Միջազգային քրեական դատարանի Հռոմի կանոնադրությունը վավերացնելու իր փաստաթուղթը, իսկ Հայաստանի համար կանոնադրությունն ուժի մեջ կմտնի 2024 թվականի փետրվարի 1-ից»,- ասված է ՄՔԴ հայտարարության մեջ։

Հայաստանը կդառնա Կանոնադրությանը միացած 124-րդ պետությունը, իսկ Արևելյան Եվրոպայի խմբից՝ 19-րդ պետությունը։

Հայաստանի Ազգային ժողովը հոկտեմբերի սկզբին 60 կողմ ձայնով վավերացրել է Հռոմի կանոնադրությունը։ Դեմ էր 22 պատգամավոր, ձեռնպահ չկար։ Հանրապետության նախագահ Վահագն Խաչատրյանը հոկտեմբերի 13-ին ստորագրել է այն վավերացնելու մասին օրենքը։