կարևոր
3949 դիտում, 9 ամիս առաջ - 2023-09-01 18:18
Հասարակություն

Թշնամու մեկ դիրք ոչնչացված է, Փաշինյանի քաղաքականությունն օրական 3-4 զոհ է նստում․ Թեւանյանը՝ Վարդենիսից

Թշնամու մեկ դիրք ոչնչացված է, Փաշինյանի քաղաքականությունն օրական 3-4 զոհ է նստում․ Թեւանյանը՝ Վարդենիսից

Մեր զինված ուժերը բավական մեծ հակահարված են տվել եւ ադրբեջանական դիրքերից մեկը ոչնչացված է՝ զինվորականների հետ իր զրույցի մանրամասները ուղիղ կապով հայտնեց «Մայր Հայաստան» դաշինքի առաջնորդ Անդրանիկ Թեւանյանը։

Նա առավոտից դադարեցրել է քարոզարշավն ու գնացել Վարդենիսի տարածաշրջան՝ լարված իրավիճակին տեղում ծանոթանալու։

Այս պահի դրությամբ 4 զոհ եւ 1 վիրավոր․ սա պաշտոնականն տեղեկությունն է։

Անդրանիկ Թեւանյանը փաստեց, որ այս պահին կրակի ինտենսիվությունը նվազել է։ Նա զրուցեց նաեւ Վարդենիսի ավագանու անդամ Դավիթ Շահնազարյանի հետ, որը վկայեց, որ թշնամին հիմնականում հրետանային միջոցներ է օգտագործել։

«Սկզբնական շրջանում հրետակոծում էին Սոթքի սահմանային դիրքերը, որից հետո սկսեց հրետակոծվել նաեւ Նորաբակի սահմանը։ Առավոտյան կողմ արդեն տեղեկություն կար, որ թշնամին խախտել է հրադադարի ռեժիմը եւ սահմանին իրավիճակը լարված է։ Մոտավորապես ժամը 9-ից եղել եմ Սոթքի տարածքում․ ինտենսիվ փոխհրաձգություն էր տեղի ունենում»,-ասաց Դավիթ Շահնազարյանը։

Նա վստահեցրեց, որ տեղի բնակիչների համար այդօրինակ միջադեպերը, ցավոք սրտի, առօրեական են դարձել․ համենայն դեպս, հրաձգային զինատեսակներից կրակոցներին մեծ ուշադրություն չեն դարձնում, բայց արդեն հրետանային միջոցների կրակից մարդիկ անհանգստացել են։ Թեեւ, ասաց, խուճապ չկա։

Անդրանիկ Թեւանյանը մատնանշեց խնդրի քաղաքական կողմը․ Փաշինյանի «խաղաղության» կոչված օրակարգի շրջանակում թշնամին անընդհատ լկտիանում է եւ փորձում լարվածություն ստեղծել սահմանին։

«Պետք է զգոն լինենք եւ կարողանանք խուսափել այդ ոչ ցանկալի զարգացումներից։ Դրա համար էլ մենք ներկայացնում ենք, որ Հայաստանի Հանրապետության թիվ մեկ օրակարգը անվտանգությունն է եւ այդ օրակարգով էլ քաղաքացիները պետք է ամեն ինչ անեն, որ փոփոխության ենթարկվի Հայաստանի ներքին կյանքը»,-ասաց Անդրանիկ Թեւանյանը։

Փաշինյանի քաղաքականությունը օրական 3-4 զոհ է նստում մեր ժողովրդի վրա, փաստեց Թեւանյանը, եւ դրան պետք է վերջ տրվի․ մենք ամեն օր արթնանում ենք մի բացասական լուրի սպասելով։ Անդրանիկ Թեւանյանը կշարունակի շփվել գյուղերի բնակիչների հետ եւ կտեղեկացնի նորությունների մասին։