Մարզպետը կա՛մ չի տիրապետում, կա՛մ խեղում է փաստերը. արձագանք Վարդենիսից

Կարդացի Գեղարքունիքի մարզպետ Գնել Սանոսյանի մեկնաբանությունը, որն առնչվում էր ՀՅԴ «Գեղամա» կոմիտեի` Վարդենիսի (ոչ միայն) ծննդատան հնարավոր լուծարման քննադատության հետ: Անկեղծ ասած` քաղաքական էթիկայից շատ հեռու մեկնաբանություն էր` պարուրված անցյալ դարի 20-30-ական թվականերին բնորոշ հակադաշնակցական երանգներով:  

Բնակչության մեծամասնությունը դեմ է ծննդատների լուծարման գաղափարին, բայց թե ինչու է մարզպետն անդրադառնում միայն «զրո քաղաքական կշիռ» ունեցող կուսակցության մտահոգությանը՝ զարմանալի չէ: Այդպիսով նա միաժամանակ մատնում է իշխանությունների  հակադաշնակացական գործելաոճը:

Դառնալով մարզպետի այն պնդմանը, թե դաշնակցությունը չեղած բանի մասին է խոսում, ասեմ, որ այստեղ նա ճիշտ չէ, ավելի կոնկրետ` կա՛մ չի տիրապետում փաստերին, կա՛մ նպատակաուղղված` խեղում է եղածը:

Ծննդատների փակման թեման իրոք արծարծվել է նախարարությունում, ավելին` դրա մասին փաստել է հենց ինքը` Վարդենիսի քաղաքապետ Արամ Մելքոնյանը` Yerkir.am կայքին տված հարցազրույցով (որը վարել եմ ես):

Հետևաբար` չի կարելի անցանկալի քաղաքական ուժերին անվանարկելու նպատակով դիմել բացահայտ անճշտությունների ու անազնիվ քայլերի` ոտնատակ անելով բաներ, որոնց տեղը գլխավերևում է:

Գևորգ Գյուլումյան

Վարդենիսի բնակիչ