Կոլիզեումի պատի վրա գրառում կատարած զբոսաշրջիկը հայտարարել է, որ չի իմացել հուշարձանի հնության մասին

Հռոմի Կոլիզեումի պատի վրա իր եւ իր ընկերուհու անունը գրած բրիտանացի զբոսաշրջիկը հայտարարել է, որ չի իմացել հուշարձանի հնության մասին։ Նա ներողություն է խնդրել եւ նամակ հղել Հռոմի դատախազությանն ու քաղաքապետարանին։

«Խորին ամոթով խոստովանում եմ, որ հուշարձանի հնության մասին իմացել եմ միայն այն բանից հետո, ինչ, ցավոք, տեղի ունեցավ»,-նամակի բովանդակությունը մեջբերում է Il Messaggero թերթը։

Հունիսի վերջին Reddit-ը հոլովակ է հրապարկել, որում պատկերված երիտասարդը  բանալիների կապոցի օգնությամբ կատարում է «Ivan+Hayley 23» գրությունը անտիկ ֆլավիական ամֆիթատրոնի աղյուսե պատին:

Հռոմի դատախազությունը տղամարդու նկատմամբ հետաքննություն է սկսել մշակութային արժեքին վնաս հասցնելու մեղադրանքով: