Խուզարկություն` «Հիմնադիր խորհրդարան»-ի գրասենյակում. տարել են համակարգիչներ, 10 տարվա հնության թղթեր

Քիչ առաջ ավարտվեց Հիմնադիր խորհրդարանի գրասենյակի խուզարկությունը: Հիմնադիր խորհրդարանի անդամ Վարուժան Ավետիսյանը խուզարկությունից հետո լրագրողների հետ զրույցում հայտնեց, որ խուզարկությունը տևել է մոտ երկու ժամ, քննչական օպերատիվ խումբը ժամանել է իրենց գրասենյակ, ցույց է տվել խուզարկություն կատարելու վերաբերյալ օրինական որոշումը և անցել գործողությունների: Վարուժան Ավետիսյանի խոսքով` Հիմնադիր խորհրդարանի նախագահ Ժիրայր Սեֆիլյանը ձերբակալվել է նախքան խուզարկությունը սկսելը: Խուզարկություն կատարողները գրասենյակից տարել են երկու համակարգիչ, երկու նոթբուք, որոնք անձնական օգտագործման են եղել: Ըստ Ավետիսյանի` իրենք այդ մասին գործողություն իրականացնողներին հայտնել են, բայց որևէ արձագանք չի եղել:

Նա հայտնեց նաև, որ խուզարկություն իրականացնողները տարել են 10 տարվա հնության անպետք թղթեր:

Ավետիսյանը այդ գործողությունները համարեց անհեթեթություն: Ինչ վերաբերում է հայտնաբերված զենք-զինամթերքին` նա հայտնեց, որ որևէ տեղեկություն չունի այդ մասին: