Արեւմուտքը ԵԱՀԿ Մինսկի խումբը քանդելուց հետո փորձում է մխրճվել Ռուսաստանի միջնորդական ջանքերի մեջ․ Լավրով

Արեւմուտքի երկրները ԵԱՀԿ Մինսկի խումբը քանդելուց հետո փորձում են մխրճվել Ռուսաստանի միջնորդական ջանքերի մեջ՝ ուղղված Հայաստանի եւ Ադրբեջանի միջեւ հարաբերությունների կարգավորմանը, բայց անարդյունավետ։ Այս մասին հայտարարել է ՌԴ ԱԳ նախարար Սերգեյ Լավրովը մամուլի ասուլիսի ժամանակ, գրում է РИА Новости-ն։

Լավրովը նշել է, որ Ռուսաստանն օգնում է Հայաստանին և Ադրբեջանին սահմանազատման հարցում և կաջակցի Երևանի և Բաքվի միջև խաղաղության պայմանագրի համաձայնեցմանը։

«Այժմ և ֆրանսիացիները, և ամերիկացիները, և Եվրամիությունն, ընդհանուր առմամբ, փորձում են սեփականաշնորհել այն պայմանավորվածությունները, որոնք կողմերը ձեռք են բերել ռուսական կողմի մասնակցությամբ։

Օրինակ, Բրյուսելում դելիմիտացիայի հանձնաժողովի նիստ են անցկացնում։ Եվ հայերը, և ադրբեջանցիները քաղաքավարի մարդիկ են և նրանք գնում են այնտեղ։ Բայց ինչպե՞ս կարելի է քննարկել սահմանազատումը՝ չունենալով նախկին միութենական հանրապետությունների քարտեզները, որոնք գոյություն ունեն միայն Ռուսաստանի գլխավոր շտաբում։ Ինձ համար դա դժվար է պատկերացնել», - հավելել Է Լավրովը։