Գերասիմ Վարդանյանի գործով քննչական խմբի ղեկավարը միացել էր հեղափոխությանը, ապա՝ բարձր պաշտոն ստացել

Գերասիմ Վարդանյանը ենթարկվում է քաղաքական հետապնդումների, նա քաղբանտարկյալն է: Այս մասին մայիսի 29-ին Ֆրանսիայի հրապարակում հայտարարեց նրա փաստաբան Բենիկ Գալստյանը:  

«Գերասիմ Վարդանյանը հայրենիքին նվիրված անձնավորություն է: Նա մասնակցել է երկու Արցախյան պատերազմներին՝ քառօրյային եւ 44-օրյա պատերազմին: Վերջին պատերազմում նա վիրավորում է ստացել: Բոլորը տեղյակ են, թե ինչ ակտիվություն է դրսեւորում Գերասիմ Վարդանյանը»,- ընդգծեց փաստաբանը:

Գալստյանի խոսքով՝ Գերասիմ Վարդանյանի գործով քննության ղեկավարն է Սուրեն Նավոյանը, որը, 2018 թվականին քննիչ լինելով, միացել էր Նիկոլ Փաշինյանի հեղափոխությանը:   Դրանից հետո նրան տեղափոխել էին Ազգային անվտանգության ծառայության քննչական վարչությունը:

Փաստաբանն ընդգծեց, որ Վարդանյանին ձերբակալել են 2022 թվականի մայիսի 12-ին՝ կապված 2020 թվականի նոյեմբերին տեղի ունեցած միջադեպի հետ: Վարդանյանի կալանավորման մասին որոշումը կայացրել է դատավոր Դավիթ Արղամանյանը:

«Վստահ եմ, որ վաղ թե ուշ նրանք քրեական պատասխանատվության կենթարկվեն, քանի որ նրանց գործողությունները հանցագործության հստակ նշաններ ունեն»,- եզրակացրեց փաստաբանը: