ԱՄՆ-ի և Թուրքիայի ներկայացուցիչները քննարկել են իրավիճակը Կովկասում, Ուկրաինայում և Ղազախստանում

ԱՄՆ նախագահի ազգային անվտանգության գծով օգնական Ջեյք Սալիվանը Թուրքիայի նախագահի պաշտոնական ներկայացուցիչ Իբրահիմ Քալընի հետ քննարկել է համաշխարհային օրակարգի մի շարք ընթացիկ հարցեր, այդ թվում՝ իրավիճակը Ուկրաինայում և Ղազախստանում։ Այս մասին ասվում է Պետդեպարտամենտի հայտարարության մեջ, որը հրապարակվել է երկուշաբթի՝ հեռախոսազրույցներից հետո։

Սալիվանն ու Քալընը «կարծիքներ են փոխանակել մի շարք տարածաշրջանային հարցերի, այդ թվում՝ Ղազախստանում տիրող իրավիճակի շուրջ»։ Նրանք համակարծիք են եղել «Բոսնիա և Հերցեգովինայում կայունության և միասնության պահպանման կարևորության, ինչպես նաև Կովկասում իրավիճակի դեէսկալացիայի և նորմալացման ուղղությամբ աշխատելու հարցում»: Սալիվանը նաև «նշել է Եթովպիայում հակամարտությունը դադարեցնելու ջանքերին աջակցելու հրատապ անհրաժեշտությունը»:

Բացի դրանից՝ կողմերը «քննարկել են դաշնակիցների և գործընկերների հետ համաձայնեցված շարունակական ջանքերը» Ուկրաինայի իրավիճակի վերաբերյալ և ընդգծել  դիվանագիտական մոտեցման կարևորությունը՝ տարածաշրջանում լարվածությունը կանխելու համար։

Անցյալ տարվա նոյեմբերին և դեկտեմբերին Թուրքիայի նախագահ Թայիփ Էրդողանը մի քանի առաջարկներ արեց Ռուսաստանին և Ուկրաինային  «լարվածությունը թուլացնելու» համար միջնորդ լինելու վերաբերյալ։