Ռուսաստանի և ԱՄՆ-ի գլխավոր շտաբների ղեկավարները քննարկել են միջազգային անվտանգությունը

Ռուսաստանի զինված ուժերի գլխավոր շտաբի պետ Վալերի Գերասիմովը և ԱՄՆ զինված ուժերի շտաբների պետերի կոմիտեի նախագահ Մարկ Միլին հեռախոսազրույց են ունեցել. հայտնում է ՏԱՍՍ-ը։

ԶՈՒ հրամանատարները քննարկել են միջազգային անվտանգության արդիական հարցեր։ «Հեռախոսազրույցը երկու երկրների ղեկավարների միջև հաղորդակցության շարունակությունն էր՝ ապահովելու ռիսկերի նվազեցումը և հակամարտությունների օպերատիվ կանխումը»,- ասվում է ամերիկյան կողմի հաղորդագրությունում:

Նշվում է, որ կողմերը պայմանավորվել են չհրապարակել իրենց զրույցի կոնկրետ մանրամասներ։

Ավելի վաղ The Wall Street Journal-ը հայտնել էր, որ Միացյալ Նահանգները հետաքրքրված է Կենտրոնական Ասիայում ռուսական ռազմաբազաներից օգտվելու հնարավորությամբ։ WSJ-ի հաղորդմամբ՝ ԱՄՆ շտաբների պետերի միացյալ շտաբի ղեկավար, գեներալ Մարկ Միլին և ՌԴ ԶՈւ գլխավոր շտաբի պետ Վալերի Գերասիմովը սեպտեմբերին Ֆինլանդիայում կայացած դեմ առ դեմ հանդիպման ժամանակ քննարկել են այդ հնարավորությունը։

Չի մանրամասնվել` արդյո՞ք քննարկվել են Ուկրաինայի հետ սահմանին լարվածությունը և ռազմական հնարավոր բախումների վերսկսման հավանականությունը: