Իրաքի վարչապետը ԱԹՍ-ներով հարձակման է ենթարկվել

Իրաքի վարչապետ Մուստաֆա ալ-Քազիմին հարձակման է ենթարկվել անօդաչու թռչող սարքերի կողմից նոյեմբերի 7-ի լույս կիրակի գիշերը։ Զինվորականների խոսքով՝ անօդաչու սարքը հագեցած է եղել պայթուցիկներով։ Իրաքի իշխանությունները հայտնում են, որ հարվածը հասցվել է երկրի կառավարության ղեկավարի նստավայրին։

Ինչպես ավելի ուշ հայտնել է քաղաքական գործիչը Twitter-ի իր էջում, նա իրեն լավ է զգում։ Ալ-Քազիմին բոլոր իրաքցիներին կոչ է արել պահպանել հանգստություն և ինքնատիրապետում։

Մի քանի ժամ անց լրատվամիջոցներում տեղեկություն հայտնվեց, որ մահափորձի ժամանակ օգտագործվել է երեք անօդաչու թռչող սարք, որոնցից երկուսը խփվել են։

Իրաքի վարչապետի նստավայրը գտնվում է Բաղդադի լավ պահպանվող Կանաչ գոտում, որտեղ տեղակայված են օտարերկրյա դեսպանատներ և կառավարական հաստատություններ: Դեռևս ոչ ոք չի ստանձնել հարձակման պատասխանատվությունը: