Թուրքիան Երևանից համարձակ և կառուցողական քայլեր է սպասում. Մուսթաֆա Շենթոփ

Թուրքիան հանդես է գալիս Կովկասը համագործակցության, համերաշխության և զարգացման գոտու վերածելու օգտին։ Այս մասին հայտարարել է Թուրքիայի Ազգային մեծ ժողովի նախագահ Մուստաֆա Շենթոփը։

Նա նշել է, որ 44-օրյա պատերազմում «Ադրբեջանի հաղթանակը վերացրել է Կովկասում կայուն խաղաղության և համագործակցության ճանապարհին հիմնական խոչընդոտը»։

«Կովկասում երկխոսության հիմք է ձևավորվել։ Երեւանը կառուցողական մոտեցում ցուցաբերելու հնարավորություն ունի. Հայաստանը պետք է հարգի 2020 թվականի նոյեմբերի 9-ի զինադադարի համաձայնագրի կետերը. պետք է խաղաղության պայմանագիր ստորագրվի»,- ընդգծել է Շենթոփը։

Թուրքիայի խորհրդարանի նախագահը կոչ է արել նաև բացել 46 կիլոմետրանոց միջանցք, այսպես կոչված, «Արևմտյան Զանգեզուրում» (Արևելյանը Արցախից օկուպացված Քարվաճառի, Քաշաթաղի, Քաշունիքի և Կովսականի շրջաններն են), որը կնպաստի համաշխարհային առեւտրին։

«Մենք Երևանից ակնկալում ենք համարձակ և կառուցողական քայլեր՝ հաշվի առնելով բուն Հայաստանի ապագայի առաջնահերթությունները»,- ասել է նա։