Թուրք զինվորները կվերադառնան. «Թալիբան»

Թուրքական իշխանամետ Yeni Şafak հրատարակության լրագրողը հարցազրույց է վերցրել Աֆղանստանի խաղաղության խորհրդի նախագահ Ազիզուլլահ Դին Մուհամմադից։

«Թուրք զինվորականները լքել են Աֆղանստանը ՆԱՏՕ-ի առաքելության ավարտից հետո: Հուսով եմ, որ նոր վարչակազմի հաստատումից հետո Թուրքիայի հետ անկախ հարաբերություններ կհաստատվեն: Թուրք զինվորները կրկին կգան այստեղ, և հարաբերություններն էլ ավելի կամրապնդվեն»,– նշել է նա։

Ազիզուլլահ Դին Մուհամմադը նաև հույս է հայտնել, որ Թուրքիան կլինի առաջին երկիրը, որը հարաբերություններ կհաստատի հետպատերազմյան Աֆղանստանի հետ. «Ինչպես ասել է Ռեիս բեյը (Էրդողանը), կան սերտ հարաբերություններ ինչպես տնտեսական, այնպես էլ քաղաքական ոլորտներում։ Դրանք շատ առումներով օգտակար կլինեն: Եվ մենք շնորհակալ ենք պարոն Էրդողանին այս ուղերձի համար: Ես հավատում եմ, որ Թուրքիան կլինի առաջին երկիրը, որը հարաբերություններ կհաստատի»:

Կարելի է ենթադրել, որ Աֆղանստանում «Թալիբան»-ի վերջնական հաստատումից հետո Թուրքիան ռազմաբազա կտեղակայի նաև այդ երկրում, ինչի վերաբերյալ ազդակներ կան նաև Թուրքիայից։