Էրդողանը հայտարարել է, որ Թուրքիա է բերվել թուրքական դպրոցների «Սապատ» ցանցի նախկին նախագահը. նա անհետացել էր Ղրղզստանում ավելի քան մեկ ամիս առաջ

Թուրքիայի նախագահ Ռեջեփ Թայիփ Էրդողանը հայտնել է, որ մասնավոր լիցեյների ցանցի հիմնադիր Օրհան Ինանդըն բերվել է Թուրքիա: Երկրի ղեկավարն այս մասին ասել է կառավարության նիստից հետո կայացած մամուլի ասուլիսում:

Թուրք նախագահի խոսքով՝ գործողությունն իրականացրել է Ազգային հետախուզական կազմակերպությունը: Օրհան Ինանդըին Էրդողանը անվանել է «Կենտրոնական Ասիայում FETO-ի (Գյուլենական շարժում) ղեկավար»: «Մենք թույլ չենք տա որևէ կառույց, որը դավաճանում է այս պետությանը և ազգին, թակարդներ է լարում, արյուն թափում կամ նյութական կամ բարոյական վնաս պատճառում, շարունակի գոյություն ունենալ»,- ըստ TRT Haber-ի՝ ասել է նա:

Էրդողանը հավելել է, որ մինչ օրս այլ երկրներից ավելի քան 100 մարդ է բերվել Թուրքիա:

Օրհան Ինանդըն, որը երկար ժամանակ ապրում էր Ղրղըզստանում և մի քանի տարի առաջ ստացել էր այդ երկրի քաղաքացիություն, անհետացել էր մայիսի 31-ին: Նրա կինը՝ Ռեյհանը, ասել էր, որ ամուսինը պահվում է Բիշքեկում Թուրքիայի դեսպանատանը, և ստիպում են հրաժարվել Ղրրղզստանի քաղաքացիությունից։

Եթե նա դա աներ, նրան կտանեին հայրենիք՝ Թուրքիա, որտեղ նրան կտանջեին: Բիշքեկում Թուրքիայի դեսպանատան մոտ բողոքի ցույցեր են անցկացվել՝ պահանջելով ազատել Ինանդըին, սակայն թուրք դիվանագետները պաշտոնապես չեն մեկնաբանել նրա առևանգումը:

Ոստիկանությունը գործ է հարուցել Քրեական օրենսգրքի 170-րդ հոդվածի հատկանիշներով («Անձի առևանգում»): Հետագայում նա Ինտերպոլի կողմից դրվել էր միջազգային հետախուզման մեջ: Այս հարցը բարձրացվել է նաև Ղրղզստանի խորհրդարանում, որտեղ հայտնի է դարձել, որ 2019 թվականին Ղրղզստանը հրաժարվել է Օրհան Ինանդըին արտահանձնել Թուրքիային: Պատգամավորները նրա անհետացումն անվանել են «քաղաքական գործողություն»՝ նշելով, որ «մարդը հենց այնպես չի անհետանում»: Միևնույն ժամանակ, Բիշքեկի ՆԳՆ-ն հավաստիացրել է, որ Օրհան Ինանդըին պաշտոնապես չի հատել Ղրղզստանի Հանրապետության պետական սահմանը: