Լիբանանի ԱԳՆ ղեկավարը հրաժարական է տվել Սաուդյան Արաբիայի հասցեին ռեպլիկ անելուց հետո

Լիբանանի արտաքին գործերի նախարարի պաշտոնակատար Շարբել Վահբին չորեքշաբթի լքել է իր պաշտոնը Սաուդյան Արաբիայի հասցեին անբարյացակամ արտահայտություններից հետո: «Lebanon 24» լրատվական պորտալի համաձայն՝ Վահբին նախագահական պալատում հանդիպել է պետության ղեկավար Միշել Աունի հետ և նրան հանձնել պաշտոնանկության մասին նամակը:

Երեքշաբթի Սաուդյան Արաբիայի արտգործնախարարությունը Էր Ռիադում Լիբանանի դեսպանին գրություն է հանձնել, որում բողոքել է «Ալհուրա» հեռուստաալիքով հեռարձակված՝ Վահբիի վիրավորական արտահայտությունների դեմ: Գրության մեջ նշվում էր, որ նման հայտարարությունները «չեն համապատասխանում տարրական դիվանագիտական նորմերին և երկու եղբայրական ժողովուրդների պատմական հարաբերություններին»:

Երկուշաբթի հեռուստաալիքին տված հարցազրույցում Վահբին ակնարկել էր, որ Սաուդյան Արաբիան և Պարսից ծոցի որոշ երկրներ իբր աջակցում են «Իսլամական պետություն» ահաբեկչական խմբավորմանը  և ահաբեկիչներին բերել են Իրաքի Նինուա և Անբար նահանգներ, սիրիական Պալմիրա քաղաք և Լիբանան:

Երեքշաբթի հանրապետության նախագահի աշխատակազմը հայտարարություն է տարածել, որում նշել է, որ նախարարի կարծիքը չի համապատասխանում պաշտոնական Լիբանանի տեսակետին Սաուդյան Արաբիայի և պարսիցծոցյան այլ բարեկամական պետությունների վերաբերյալ։

Ավելի ուշ Լիբանանի արտգործնախարարը Twitter-ում պաշտոնական ներողություն է խնդրել Սաուդյան Արաբիայից՝ երկիրը որակելով որպես «բարության և հաշտության թագավորություն»:

Վահբին նշանակվել է Լիբանանի արտաքին գործերի նախարարի պաշտոնում 2020 թվականի օգոստոսի 3-ին՝ իր նախորդ Նասիֆ Հիթիի պաշտոնաթողությունից մեկ օր անց: Նույն տարվա օգոստոսի 10-ին Բեյրութի ծովային նավահանգստում պայթյունի պատճառած ողբերգությունից հետո վարչապետ Հասան Դիաբի գլխավորած կաբինետը հրաժարական էր տվել: