ՏԵՍԱՆՅՈՒԹ․ Դավաճանի ցանցի մեջ լինելը խարան է․ Ա․ Մինասյանը՝ «Իմ քայլի» պատգամավորներին

Դավաճանի ցանցի մեջ լինելը խարան է, պետականության դեմ ուղղված հանցագործություն է, որ պատմությունը երբեք չի ներել ու ներում՝ ըստ Yerkir.am-ի հայտարարեց ՀՅԴ Հայաստանի ԳՄ անդամ Արծվիկ Մինասյանը ԱԺ մուտքերի առջև բողոքի ակցիայի ժամանակ, որում ցուցարարները «ամոթի պատ» են կազմել և շենք մտնող իմքայլական պատգամավորներին հատուկ վերաբերմունքի են արժանացնում:

«Պատմության դասագրքերում այդ մարդիկ պետք է մնան՝ նրանք, ովքեր դավաճանին չեն ուզում հանձնել, կմնան որպես հայ ժողովրդի մեծագույն թշնամիներ և դավաճաններ»,-ասաց նա։

Մինասյանը չափազանց կարևոր է համարում, որ պատգամավորները գիտակցեն իրենց երդման արժեքը, որի ուխտերից մեկը Հայաստանի ինքնիշխանության և հայ ժողովրդի պաշտպանությունն է։

«Եկել է ժամանակը, որ իրենք իրենց երդմանը տեր լինեն, իսկ դա նշանակում է պաշտոնանկ անել դավաճանին և հնարավորություն տալ դավաճանական ողջ ցանցը բացահայտել, որովհետև առանց դրա հնարավոր չէ Հայաստանի հետագա զարգացումը։ Պատգամավորները, ովքեր քիչ թե շատ գիտակցում են ինչ բան է երդումը, ինչ բան է հայ ժողովրդի շահերը ներկայացնելը, պետք է սթափվեն»,-ասաց նա։

Արծվիկ Մինասյանն ընդգծում է, որ սա համառ և հետևողական պայքար է, որովհետև գործ ունենք կազմակերպված դավաճանական գործողության հետ Հայաստանի ու հայ ժողովրդի հանդեպ։

«Սա մեկ կամ մի քանի անձի խնդիր չէ, համակարգային և ցանցային այս պայքարը, որ Հայաստանի Հանրապետության դեմ է ուղղված եղել, և որի բացասական հետևանքները մենք տեսնում ենք ի դեմս 5000-ից ավելի զոհերի, բազմահազար խեղված ճակատագրերի, տնավեր դարձած հայրենակիցների, անհետ կորած և գերեվարված քաղաքացիների, պարզ է, որ դիմադրությունը լինելու էր ամուր․ դա էր պատճառը, որ այսքան երկար է տևում»,-ասաց նա։

Փաշինյանին հեռացնելու պայքարի՝ երկար տևելու հաջորդ պատճառը Արծվիկ Մինասյանը համարում է այն, որ իշխանության մեջ եղած մարդիկ, ովքեր դեռևս չեն գիտակցել, որ կազմակերպված հանցագործության հետ գործ ունենք, նրանք դեռևս վերաիմաստավորման փուլում են։

«Այս ակցիայի նպատակը՝ «Իմ քայլի» պատգավամավորներին հիշեցնելն է իրենց երդման մասին»,-ասաց Մինասյանը։

Մանրամասն՝ տեսանյութում․