Լեռնային Ղարաբաղում կան ճգնաժամի ամբողջական կարգավորման պայմաններ. Պուտին

Լեռնային Ղարաբաղում հակամարտությունը կարող է ամբողջությամբ լուծվել Ռուսաստանի միջնորդությամբ: Այս մասին նոյեմբերի 17-ին հայտարարել է ՌԴ նախագահ Վլադիմիր Պուտինը BRICS-ի շրջանակներում հանդիպման ժամանակ:

«Սեպտեմբերին Լեռնային Ղարաբաղում հակամարտությունը սուր փուլ էր թևակոխել: Ռուսական կողմն ամենաակտիվ ջանքերն է գործադրել`օգնելու դադարեցնել ռազմական գործողությունները երկու բարեկամ պետությունների միջև և դրդելու նրանց գտնել փոխզիջումային լուծում»,- ասել է Պուտինը:

«Մեր միջնորդության արդյունքում նոյեմբերի 9-ին պայմանավորվածություն է ձեռք բերվել ամբողջական հրադադարի և Լեռնային Ղարաբաղում ռուսական խաղաղապահ զորախմբի տեղակայման մասին»,- հիշեցրել է նա:

Ըստ Պուտինի՝ պայմանավորվածությունները հարգվում են, ռազմական գործողություններն ամբողջությամբ դադարեցվել են:

«Իրավիճակը կայունանում է: Այսպիսով՝ պայմաններ են ստեղծվել ճգնաժամի երկարաժամկետ և համապարփակ կարգավորման համար: Ավելին՝ արդար հիմքերի վրա՝ բխելով ինչպես ադրբեջանցի, այնպես էլ հայ ժողովուրդների շահերից»,- ասել է ՌԴ նախագահը: