Եթե Իրանի տարածքի ուղղությամբ հրետակոծությունը շարունակվի, Թեհրանն անտարբեր չի մնա․ Իրանի ԱԳՆ

Իրանի ԱԳՆ խոսնակ Սաիդ Խաթիբզադեն հայտարարել է. «Եթե Իրանի տարածքի ուղղությամբ հրետակոծությունը շարունակվի, Թեհրանն անտարբեր չի մնա»: Այս մասին գրում է Pars Today-ը։

Անդրադառնալով ԼՂ հակամարտության տարածքում ընթացող ռազմական բախումների հետևանքով Իրանի Խոդաաֆարին շրջանի գյուղերից մեկին հասցված վնասներին, Խաթիբզադեն հայտարարել է, որ Իրանի սահմանապահ ուժերը պատասխան քայլի չեն դիմել:

Նա հավելել է. «Մեր երկրի սահմանամերձ շրջանների անվտանգությունն ու խաղաղությունը ԻԻՀ զինված ուժերի կարմիր գիծն է, և եթե նման միջադեպերը կրկնվեն, Իրանն անտարբեր չի մնա»:

Նշվում է, որ ԼՂ հակամարտության տարածքից Իրանի Արևելյան Ատրպատական նահանգի Խոդաաֆարին շրջանի Ղոլիբիգլու գյուղում ընկած հրթիռի հետևանքով վնասվել է մի տուն և տուժել մի բնակիչ:

Որոշ ռուսական աղբյուրներ ավելի վաղ հայտնել էին, որ Իրանը պատասխան քայլի է դիմել այն կողմի ուղղությամբ, որտեղից արձակվել է հրթիռը:

Խոդաաֆարին շրջանի ղեկավար Ալի Ամիրի Ռադը հինգշաբթի հայտարարել էր, որ Լեռնային Ղարաբաղի տարածաշրջանում հայկական և ադրբեջանական ուժերի բախումների ընթացքում 10 մարտական հրթիռ է ընկել Ղոլիբիգոլի և Քյադխոդալու գյուղերում:

Հակամարտության բախումների սկզբից ի վեր 50-ից ավելի հրթիռներ են ընկել Խոդաաֆարին շրջանի մերձակա գյուղերում: