Պարետի որոշումն օրենք չէ, պաշտպանե´ք ձեր իրավունքները մեզ հետ միասին. Ա. Մինասյանի տեսաուղերձը

ՀՅԴ Հայաստանի Գերագույն մարմնի անդամ Արծվիկ Մինասյանն իր ֆեյսբուքյան էջում տեսաուղերձ է հրապարակել, որում անդրադառնում է դատական կարգով դիմակ չկրելու համար կիրառվող անհիմն տուգանքները վիճարկելու թեմային:

Տեսանյութին կից քաղաքական գործիչը, դիմելով քաղաքացիներին, գրել է. «Բոլոր այն անձինք, որոնք այս ամիսների ընթացքում տուժել են պարետի անօրինական պահանջներից, կարող են դիմել մեզ։ Մենք կօգնենք ձեզ պաշտպանել ձեր իրավունքները»:

Հիշեցնենք՝ օգոստոսի 27-ին ՀՅԴ Հայաստանի Գերագույն մարմնի գրասենյակում տեղի էր ունեցել Բարգավաճ Հայաստան, Հայ Յեղափոխական Դաշնակցություն և Հայրենիք կուսակցությունների աշխատանքային խմբի հերթական նիստը, որտեղ քննարկելով համավարակի հետևանքով երկրում ստեղծված ծանր սոցիալ-տնտեսական կացությունը, գործազրկության և աղքատության հարաճուն տեմպերը, աշխատանքային խումբը որոշել էր մշակել արտակարգ դրության իրավական ռեժիմի խախտման պատճառով կիրառված տուգանքները չեղարկելու (համաներելու) մասին նախագիծ:  Բացի այդ՝ աշխատանքային խումբը որոշում էր  կայացրել դատական կարգով վիճարկել դիմակ չկրելու համար կիրառվող անհիմն տուգանքները և միջնորդել դատարանին՝ կասեցնելու Պարետի համապատասխան որոշումը: