Թուրքիան և ԵՄ-ն կթարմացնեն անօրինական միգրացիան սահմանափակելու մասին համաձայնագիրը

Եվրամիությունը և Թուրքիան կթարմացնեն անօրինական միգրացիան սահմանափակելու մասին համաձայնագիրը՝ թուրք-հունական սահմանին ստեղծված միգրացիոն ճգնաժամը լուծելու նպատակով: Նման որոշում է ընդունվել Թուրքիայի նախագահ Ռեջեփ Թայիփ Էրդողանի բրյուսելյան այցի ժամանակ. հայտնում է Yerkir.am-ը՝ Euronews-ին հղումով:

Նշվում է՝ օրերս Եվրոպական հանձնաժողովի փոխնախագահ, Եվրոպական միության արտաքին գործերի և անվտանգության քաղաքականության հարցերով բարձր ներկայացուցիչ Ժոզեֆ Բորելի և Թուրքիայի արտգործնախարար Մևլյութ Չավուշօղլուի գլխավորությամբ աշխատանքային խմբերը պետք է համաձայնեցնեն պայմանագրի նոր պայմանները: Միաժամանակ, թուրքական պատվիրակությունը բանակցություններն անվանել է «արդյունավետ»:

Հիշեցնենք՝ ավելի վաղ Սիրիայի Իդլիբում իրավիճակի սրման ֆոնին Թուրքիան հայտարարություն էր տարածել, որ այլևս չի խոչընդոտի Սիրիայից և այլ երկրներից Եվրոպա գնալ ցանկացող ներգաղթյալներին, որից հետո հազարավոր մարդիկ ծովով և ցամաքով ուղղվեցին դեպի Հունաստանի սահման՝ փորձելով հատել այն և գնալ Եվրոպական երկրներ: