1874 զոհ, 73 հազարից ավելի վարակակիր. չինական կորոնավիրուսի ներկայիս պատկերը

COVID-2019 կորոնավիրուսն աևդեն հասցրել է խլել 1874 մարդկային կյանք: Վերջին օրվա ընթացքում բռնկված համաճարակի հետևանքով միայն Չինաստանում մահացել է 99 մարդ. հայտնում է Yerkir.am-ը՝ ՌԻԱ «Նովոստի»-ին հղումով:

Վիրուսային դեպքերի ընդհանուր թիվը 73 335 է:

Նշվում է՝ առողջացել է 12 799 պացիենտ, սակայն դեռևս հիվանդ է 58 662-ը, իսկ նրանցից 17 795-ը ծանր կամ ծայրահեղ ծանր վիճակում է:

COVID-19 կորոնավիրուսի 454 դեպք է ախտորոշվել Diamond Princess զբոսանավի հիվանդների շրջանում, որը փետրվարի 3-ից ճապոնական Յոկոհամա նավահանգստում կարանտինի մեջ է: Նավում ընդհանուր առմամբ կա 3700 ուղևոր:

Ըստ նախնական պլանի՝ նավը պետք է երկշաբաթյա շրջագայություն կատարեր Կագոշիմա – Հոնկոնգ – Օկինաուա երթուղով, բայց այն կարանտինի մեջ են դրել, երբ Հոնկոնգում ափ իջած ուղևորներից մեկի մոտ կորոնավիրուս էին հայտնաբերել:

Yerkir.am-ն ավելի վաղ տեղեկացրել էր, որ անհայտ տեսակի վիրուսի համաճարակը բռնկվել է 11 մլն բնակչություն ունեցող Ուհան քաղաքում: Որոշ ժամանակ անց, սակայն, այն տարածվել է նաև Չինաստանից դուրս մի շարք երկրներում, ինչը համաշխարհային խուճապի պատճառ է դարձել: Այս պահի դրությամբ COVID-2019 կորոնավիրուսի զոհերի թիվը Չինաստանում հասել է 1770-ի, իսկ վարակման հաստատված դեպքերի թիվը՝ 70 548-ի: