Արսեն Բաբայանը դատական հայց կներկայացնի Նիկոլ Փաշինյանի դեմ

ԱԺ աշխատակազմի ղեկավարի նախկին տեղակալ, իրավապաշտպան Արսեն Բաբայանը դատական  հայց կներկայացնի ՀՀ վարչապետ Նիկոլ Փաշինյանի դեմ: Այս մասին, ըստ yerkir.am-ի, այսօր` փետրվարի 15-ին, նա հայտնեց մամուլի ասուլիսում:

«Պատրաստվում եմ դիմել դատարան` պահանջելով ՀՀ վարչապետից, որպեսզի ԱԺ ամբիոնից հերքի իր հայտնած տեղեկությունները իմ վերաբերյալ քրեական  գործի հետ կապված եւ ներողություն խնդրի»,- ասաց Բաբայանը` նշելով, որ դեռ քննարկում են դատական հայց ներկայացնելու մանրամասները:

Նշենք, որ Արսեն Բաբայանը մեղադրվում է ՀՀ քրեական օրենսգրքի 38-300-րդ հոդվածի եւ 314-րդ հոդվածի 1-ին մասերով` Արա Բաբլոյանի եւ այլ պաշտոնատար անձանց կողմից ՀՀ սահմանադրական դատարանի լիազորություններին տիրանալուն օժանդակելու, ինչպես նաեւ պաշտոնեական կեղծիք կատարելու մեջ: