Ռուսաստանում Չինաստանի նոր գլխավոր հյուպատոսը մեկուսացվել է. նա երկու շաբաթ կարանտինային գոտում կմնա

Չինաստանի նոր գլխավոր հյուպատոս Ցոյ Շաոչունը պաշտոնական հանդիպումների անցկացման նպատակով ժամանել է Եկատերինբուրգ, սակայն երկշաբաթյա կարանտինի մեջ է հայտնվել. ըստ Yerkir.am-ի՝ այս մասին հայտնում է Interfax-ը՝ Եկատերինբուրգում Ռուսաստանի արտաքին գործերի նախարարության ներկայացուցիչ Ալեքսանդր Խարլովի խոսքերին հղումով:

Ըստ գործակալության տվյալների՝ Շաոչունը Ռուսաստան է ժամանել փետրվարի 6-ին: Նա նախատեսել էր մի շարք պաշտոնական հանդիպումներ անցկացնել, սակայն դրանք հետաձգվել են, քանի որ առաջիկա երկու շաբաթը դիվանագետը ստիպված կլինի տանն անցկացնել:

Հավելվում է նաև, որ փետրվարի 7-ին Եկատերինբուրգ ժամանած և  «Бодрость» առողջարանի կարանտինային գոտում մնացած 58 չինացու ինքնազգացողությունը լավ է: Չինաստանի ևս 70 քաղաքացի Եկատերինբուրգի մերձակայքում գտնվող Բոգդանովիչ քաղաքի հանրակացարաններից մեկում է հյուրընկալվել:

Բժիշկների հավաստիացմամբ` մեկուսացման մեջ գտնվողներից որևէ մեկի մոտ վիրուս չի հայտնաբերվել: