Վրաստանում կրթության և մշակույթի նախարարություններն առանձնացվում են

Վրաստանի կառավարության որոշմամբ՝ առանձնացվում են կրթության և մշակույթի նախարարությունները. ըստ Yerkir.am-ի՝ հայտնում է apsny.ge-ն՝ երկրի խորհրդարանի կրթության, գիտության և մշակույթի հանձնաժողովի նախագահի առաջին տեղակալ Նուկրի Քանթարիայի խոսքերին հղումով:

Նա, մասնավորապես, ասել է.  «Կրթության և մշակույթի նախարարությունների առանձնացման վերաբերյալ համաձայնությունն արդեն կա: Համաձայնության ենք եկել, որ վերոնշյալ գերատեսչությունների միացումը սխալ էր և պետք է վերադառնալ սկզբնական կետին: Գործընթացը կմեկնարկի փետրվարին, ինչից հետո կտեղափոխվի խորհրդարան, շատ օրենքների վերնագրեր փոխելու կարիք կունենանք» ու հավելել, որ սպորտը կմնա կրթության նախարարություն կազմում:

Անդրադառնալով բյուջեի թեմային՝ պաշտոնյան նկատել է, որ նախարարության մասնատումը որևէ խնդրի պատճառ չի դառնա, քանի որ բյուջեն մշակույթի ոլորտի համար առանձին հոդվածով է հատկացվում:

Yerkir.am-ն ավելի վաղ տեղեկացրել էր, որ դեռևս 2018-ին Վրաստանի նախկին վարչապետ Մամուկա Բախտաձեի որոշմամբ՝ երկրում ձևավորվել է 10 նախարարություն և մեկ պետնախարարություն:

Ըստ կառավարական փոփոխությունների՝ Մշակույթի և սպորտի նախարարությունը միացել էր Կրթության և գիտության նախարարությանը: