30 տարի առաջ Ադրբեջանում շարունակվել է Թուրքիայի սկսած Հայոց Ցեղասպանությունը․ քննարկում Արցախում

Հունվարի 20-ին Արցախի Հանրապետության Ազգային Ժողովում կազմակերպվել է քննարկում՝ նվիրված Բաքվի հայ բնակչության զանգվածային ջարդերի 30-րդ տարելիցին: Քննարկմանը մասնակցում էին ԱՀ ԱԺ նախագահ Աշոտ Ղուլյանը, ԱՀ արտաքին գործերի նախարարի տեղակալ Արմինե Ալեքսանյանը, պատգամավորներ, ԼՂՀ Փաստականների միության անդամներ, Բաքվի ջարդերի ականատեսներ, լրագրողներ, երիտասարդներ:

Քննարկման հիմնական բանախոսը ամերիկահայ գրող, իրավաբանական գիտությունների թեկնածու Աննա Աստվածատուրյան Թերքոթն էր: Աննա Աստվածատուրյանն այժմ ապրում է ԱՄՆ-ում, ծնվել է Բաքվում և 11 տարեկան էր, երբ ստիպված էր հեռանալ Բաքվից:

Աննայի խոսքով՝ իրենց ընտանիքը Բաքվից հեռացել է 1989թ. սեպտեմբերին, նախքան հարևաններին կոտորելը, ովքեր չէին էլ կասկածում, որ Բաքվի նման ինտերնացիոնալ քաղաքում այդպիսի բան կկատարվի: «Վերջին 100 տարվա ընթացքում մեր ընտանիքը 3 անգամ մասսայական տեղահանության, Ցեղասպանության է ենթարկվել: 30 տարի առաջ մեր ընտանիքը նորից ենթարկվեց տառապանքի և հույս ունեմ, որ դա վերջին անգամն էր»,- ասել է Աննան:

Աննայի համար ողբերգականը ոչ միան հարազատներ ու բնակարան կորցրելն էր, այլև ջարդերից հետո աշխարհով մեկ սփռվելը, արմատներից հեռանալը: «Ես ապրում եմ օտար երկրում, ինձ տանն եմ զգում միայն Արցախում և Խնձորեսկում»,- նշել է նա:

Նրա համար ցավալի է, որ պետական մակարդակով ադրբեջանահայերի հետ կատարվածին գնահատական չի տրվել: «Մի քանի օր առաջ ՀՀ պառլամենտում երկու հայկական պետությունների խորհրդարանները մեզ հետ պատահածը պաշտոնապես ընդունել են: Հույս ունեմ, որ դա առաջին քայլն է, որովհետև մինչ այժմ միասնական պետական քաղաքականություն չի մշակվել Ադրբեջանի հանցավոր գործողություններին գնահատական տալու համար»,- ավելացրել է Աննա Աստվածատուրյանը:

Քաղաքագետ Ալեքսանդր Մանասյանի կարծիքով Ադրբեջանում տեղի ունեցածը Թուրքիայի իրագործած հայերի ցեղասպանության շարունակությունն է. «Դա նույն ցեղասպանությունն է, ցեղասպանողները՝ թուրքերն են և ցեղասպանվողը նույն հայն է: Նույն Ցեղասպանությունն է տարբեր պետություններում»

Քաղաքագետի կարծիքով անհրաժեշտ է ադրբեջանահայության գործոն ձևավորել, տարբեր երկրներում ապրող ադրբեջանահայերից միջազգային կազմակերպություն ստեղծել, որը կխոսի ինքն իր մասին:

Տաթևիկ Աղաջանյան