Թուրքական ապրանքների ներմուծման հոսքերի մասով մտահոգություններ կան. Սուրեն Պարսյան

Օրեր առաջ Շիրակի մարզպետ Տիգրան Պետրոսյանը տարեվերջյան մարզխորհրդի նիստի ժամանակ հայտնել է, որ գալիք տարվանից պատմական Անի մայրաքաղաքի հարևանությամբ գտնվող տարածքի մուտքի ռեժիմը փոփոխվելու է: Այսինքն՝ 2020 թվականին Շիրակի մարզի Նորշեն (Խարկով) գյուղ մտնելու համար այլևս անցագրի անհրաժեշտություն չի լինի: Այն Անի բերդաքաղաքից բաժանվում է ընդամենն Ախուրյան գետով:

Սահմանային գյուղ ազատ մտնել ներկա պահին հնարավոր չէ: Պետք է պարտադիր ստանալ սահմանապահ ուղեկալի թույլտվությունը, որը երկարատև՝ շուրջ մեկ ամիս տևող գործընթաց է...

Օրեր առաջ Շիրակի մարզպետ Տիգրան Պետրոսյանը տարեվերջյան մարզխորհրդի նիստի ժամանակ հայտնել է, որ գալիք տարվանից պատմական Անի մայրաքաղաքի հարևանությամբ գտնվող տարածքի մուտքի ռեժիմը փոփոխվելու է: Այսինքն՝ 2020 թվականին Շիրակի մարզի Նորշեն (Խարկով) գյուղ մտնելու համար այլևս անցագրի անհրաժեշտություն չի լինի: Այն Անի բերդաքաղաքից բաժանվում է ընդամենն Ախուրյան գետով:

Սահմանային գյուղ ազատ մտնել ներկա պահին հնարավոր չէ: Պետք է պարտադիր ստանալ սահմանապահ ուղեկալի թույլտվությունը, որը երկարատև՝ շուրջ մեկ ամիս տևող գործընթաց է:

168.am-ի հետ զրույցում թուրքագետ Անդրանիկ Իսպիրյանը նշեց, որ իրականում արտառոց ոչինչ տեղի չի ունեցել:

«Ամեն ինչ սկսվեց նրանից, որ այդ մասին լուրը տարածեց «Հայկական Ժամանակ» օրաթերթը՝ բավականին մանիպուլյատիվ վերնագրով՝ «Անիի սահմանը բացվեց»: Եվ շատերը դրանից հետո ինձ զանգում և հարցնում էին՝ արդեն կարո՞ղ ենք Անի գնալ:

Սրանից ավելի մանիպուլյացիա դժվար է պատկերացնել: Կարող էին այլ վերնագիր դնել, օրինակ՝ «այսուհետ կարելի է Անիին կամ սահմանին մոտենալ»: Իրականում ոչինչ տեղի չի ունեցել, նախկինում էլ էին գնում և նայում Անիին, պարզապես այդ գործընթացը, որ նախապես պետք է տվյալները տային, հետո անձնագրով գնային, դյուրացվել է: Եվ սա սարքել, թե սահմանը բացվեց, ներկայացնել՝ որպես մեծ ձեռքբերում, զավեշտալի է: Չկա ցամաքային անցնելու տարբերակ, ՀՀ-ի կողմից բավականին խիստ է հսկվում՝ ռուսական ստորաբաժանումներն են: Այդ հատվածով անցնողները, միևնույն է՝ լինելու են սահմանապահների հսկողության տակ, մտածել, որ մեկը վազելով կիջնի, կկրակեն պարզապես: Այս փաստը չի կարելի կապել նաև հայ-թուրքական սահմանի բացման հետ, դա անհիմն է և անտեղի»,- շեշտեց թուրքագետը:

ՀՅԴ Բյուրոյի տնտեսական հետազոտությունների գրասենյակի պատասխանատու Սուրեն Պարսյանն իր հերթին՝ նշեց, որ տուրիստական տեսանկյունից դրական է մուտքի ռեժիմի փոփոխությունը, քանի որ, այո՛, նախկինում պետք էր նախօրոք թույլտվություն ստանալ:

Պատեհ առիթն օգտագործելով՝ տնտեսագետն ուշադրություն հրավիրեց Թուրքիայից ներմուծման ծավալների աճի վրա:

«Վերջին տարիների ընթացքում ավելանում են Թուրքիայից ներմուծման ծավալները: Եվ թուրքական ապրանքների ներմուծման հոսքերի մասով մտահոգություններ կան: Նախորդ տարվա համեմատ ներմուծման աճը կազմել է մոտ 14 տոկոս, հատկապես թուրքական տեքստիլի ներկրումը մեծ հարված է հասցնում հայկական ընկերություններին: Թուրքական հագուստի գինը ցածր է մեր շուկայում, քանի որ Թուրքիայում էներգակիրների գներն անհամեմատ ցածր են, քան Հայաստանում, ինչպես նաև՝ թուրքական կառավարությունը սուբսիդավորում է արտահանումը»,- նշեց Պարսյանը՝ հավելելով, որ այս տարվա ընթացքում թուրքական լիրայի արժեզրկումը նպաստեց Հայաստան թուրքական ապրանքների ներկրման ծավալների աճին:

Ըստ նրա՝ վրացական շուկան առավել շատ է տուժում թուրքական ապրանքների ներկրումից և թուրքական ներդրումների ծավալների զգալի կրճատումներից։

«Այս իրավիճակում Հայաստանի տնտեսական քաղաքականությունը պետք է միտված լինի թուրքական ապրանքների ներկրման փոխարինմանը»,- շեշտեց Պարսյանը: