ԻՊ-ի և «Ան Նուսրա»-ի՝ նոր խալիֆայություն ստեղծելու փորձերը ձախողվել են. Լավրով

«Իսլամական պետություն» ու «Ջեբհաթ ան Նուսրա» ահաբեկչական կազմակերպությունները պարտություն են կրել, մասնավորապես՝ Սիրիայում նոր խալիֆայություն ստեղծելու հարցում, նրանց օրերը հաշվված են, սակայն նրանք շարունակում են տարածվել ամբողջ աշխարհում. ըստ Yerkir.am-ի՝ այս մասին հայտարարել է ՌԴ ԱԳ նախարար Սերգեյ Լավրովը՝ ՌԻԱ «Նովոստի»-ին հղումով:

«Որպեսզի գնահատենք այս կամ այն երկրում իրադրությունը, կարևոր է նախ և առաջ հիշել այս խնդրի ակունքները: Իսկ գլոբալ ահաբեկչական սպառնալիքը հատկապես լրջացել է այն բանից հետո, երբ տեղի է ունեցել անօրինական ներխուժումը Իրաք և Լիբիայի նկատմամբ ագրեսիան: Այս պահին, այսպես կոչված, «Իսլամական պետությունը» հատկապես Սիրիայում պարտություն է կրել խալիֆայությունը ստեղծելու տեսանկյունից: ԻՊ-ի, ինչպես նաև «Ան Նուսրա»-ի ցրված խմբավորումները շարունակում են դիմադրություն ցույց տալ, բայց բոլորն էլ հասկանում են, որ նրանց օրերը հաշվված են»,– հայտարարել է Լավրովը:

Ըստ նախարարի՝ այդ ահաբեկչական խմբավորումների զինյալները ցրվում են ամբողջ աշխարհով, այդ թվում՝ Աֆղանստան, Կենտրոնական Ասիա, Եվրոպա և Հարավարևելյան Ասիա: