Ռուսաստանի ՊՆ-ն ցուցադրել է «Իսկանդեր-Մ» համակարգի գործարկման կադրերը

Ռուսաստանի պաշտպանության նախարարությունը տեսանյութ է հրապարակել, որում ցուցադրվում է, թե ինչպես են գործարկվում և թիրախներին խփում «Իսկանդեր-Մ» բալիստիկ հրթիռային համակարգերը: Համակարգերը գործարկվել են Ղազախստանում գտնվող «Սարըշագան» զորավարժարանում:

Ռուսական արտադրության «Իսկանդեր-Մ» համակարգերից ունի միայն ՌԴ-ն: Արտասահմանյան գնորդների համար Ռուսաստանն արտադրում է «Իսկանդեր-Է» համակարգերը, որոնք «Իսկանդեր-Մ»-ի պարզեցված տարբերակն են: Պարզեցված համակարգն ունի մինչև 280 կմ հեռահար հարված: Դա, հավանաբար, պայմանավորված է նրանով, որ միջազգային համաձայնագրերով չի թույլատրվում կիրառել 300 կմ-ից ավելի հեռահարություն ունեցող զինատեսակներ: «Իսկանդեր-Է» համակարգերի առաջին և միակ գնորդը համարվում է Հայաստանը: 2017 թ. հայտարարվել էր, որ հյուսիսաֆրիկյան ևս մեկ պետություն ձեռք է բերել պարզեցված տարբերակը, սակայն մանրամասներ չեն հաղորդվել: