Թուրքիայում դանակահարված Արփինեն և ընտանիքը հեռացել են Թուրքիայից

Ստամբուլի հայաշատ Սամաթիա թաղամասում բնակվող Արփինե Թումանյանը ընտանիքի հետ հեռացել է Թուրքիայից: Մայիսի 31-ին երկու դիմակավորված անձի կողմից Արփինեն դանակահարվել էր, իսկ հանցագործները փախչելու պահին գոռացել են` դա դեռ սկիզբն է, և թողել վիրավորական արտահայտություններով գրություն` «Գյավուրներ, ռադ եղեք»:

Հիվանդանոց տեղափոխվելուց հետո Արփինեն ապաքինվել էր, սակայն որոշել էին լքել Թուրքիան: Թուրքական Artı TV-ին հայտնում է, որ ընտանիքը, գտնվելով սպառնալիքների տակ, հեռացել է երկրից:

Դեպքին անդրադարձել է ԹԱՄԺհայազգի պատգամավոր Կարո Փայլանը: Հղում անելով վերոնշյալ հեռուստաընկերությանը` նա նշել է. «Արփինեի վրա կատարված` ատելությամբ լի հարձակումից անցել է 40 օր: Չնայած բոլոր մարմիններին մեր կողմից արված կոչերին` հանցագործներին չեն ձերբակալել: Հասարակությունն անհրաժեշտ ընկալունակություն չցուցաբերեց: Ամաչում եմ, որ Թումանյան ընտանիքին չեմ ասել` մի' գնացեք: Ատելությունը դարձյալ հաղթեց»: