Ավստրիայի կանցլերը առաջին անգամ կարող է կին լինել

Ավստրիայի Սահմանադրական դատարանի նախագահ Բրիգիտե Բիրլյայնը կարող է դառնալ երկրի առաջին կին կանցլերը: Այդ մասին հայտնում է РИА Новости-ն` տեղական ԶԼՄ-ներին հղումով:

Այսօր Ավստրիայի նախագահը պաշտոնապես կհայտնի նոր կանցլերի անունը, որը կղեկավարի կառավարությունը մինչև սեպտեմբերին նախատեսված խորհրդարանական ընտրությունները:

Սեբաստիան Կուրցի կառավարությունը երեքշաբթի պաշտոնանկ արվեց` սկանդալային տեսագրության հետ կապված:

Հիշեցնենք, որ խորհրդարանը անվստահություն էր հայտնել Կուրցին: Ավելի վաղ Spiegel և Sueddeutsche Zeitung պարբերականներ, իրենց տրամադրության տակ գտնվող տեսանյութին հղումով, հայտնեցին, որ արդեն նախկին փոխկանցլեր Հայնցե Քրիստիան  Շտրախեն 2017-ին քննարկել է ենթադրաբար ռուսաստանցի Ալյոնա Մակարովայի հետ նրա կողմից ավստրիական Kronen Zeitung պարբերականի գնումը, որպեսզի օժանդակություն ստանա նախատեսվող ընտրությունների ժամանակ: