Թուրք անասնագողերը դաժան ծեծի են ենթարկել հայ ախոռապանին

Թուրքիային սահմանակից Ախալքալաք շրջանի հայաբնակ Կարծախ գյուղում թուրք անասնագողերը հարձակում են գործել հայ ախոռապան Սարգիս Գասպարյանի վրա. հաղորդում է reginfo.ge կայքը:

Միջադեպը տեղի է ունեցել մայիսի 20-ի գիշերը։ Ըստ Գասպարյանի` հարձակման պահին ինքը հեռախոսով էր խոսում:

«Կրակեցին շան վրա, իսկ ինձ հարվածեցին ինքնաձիգով, ինչ-որ բան լցրեցին վրաս և սկսեցին ձեռքերս կապել, այնուհետև ձեռնաշղթաներ հագցրեցին, բերանս փակեցին և հեռացան։ Նրանք թուրքերեն էին խոսում»,- պատմել է պահակը։

Կայքի հաղորդմամբ` վրաց սահմանապահներին հաջողվել է հետ վերադարձնել գողացված անասունները, նախքան ավազակները կհատեին Թուրքիայի սահմանը, սակայն կողոպտիչներից 4-ը կարողացել են փախչել։

Սա Վրաստանի սահմանամերձ գյուղերում անասունների գողության առաջին դեպքը չէ, և բոլոր դեպքերում էլ անասուններին տարել են Թուրքիա։

Վրաստանի ՆԳՆ-ում փաստի առթիվ հետաքննություն է սկսվել։