Փաշինյանը պետք է մինչև վերջ տանի Քոչարյանի դեմ գործը, որ վստահության մակարդակը չընկնի. ռուսաստանցի փորձագետ

ՀՀ վարչապետ Նիկոլ Փաշինյանի համար կարևոր  է «արձանագրել» բնակչության շրջանում վստահության ներկայիս մակարդակը, դրա համար նա պետք է մինչև վերջ տանի  ՀՀ երկրորդ նախագահ Ռոբերտ Քոչարյանի դեմ գործը: Նման կարծիք РИА Новости-ի հետ զրույցում հայտնել է փորձագետ, Կովկասի խնդիրների կենտրոնի աշխատակից Վադիմ Մուխանովը:

Ըստ նրա` իր քայլերով Փաշինյանը փորձում է ցույց տալ, որ չի մոռանում իր  խոստումների մասին իշխանության գալուց հետո:

«Հենց մոռանա Քոչարյանի գործի մասին, նրա հանդեպ վստահության մակարդակը արագ կընկնի, իսկ նա չի կարող դա թույլ տալ, քանի որ մտադիր է երկար մնալ քաղաքականությունում»,- ասել է փորձագետը:

Մուխանովի կարծիքով` Փաշինյանի կոչը չի կարելի անվանել վարչապետի կողմից դատարանի վրա ուղղակի ճնշում, սակայն նրա հայտարարություններն արդեն ազդում են երկրում հասարակական-քաղաքական կարծիքի վրա: