Պաղեստինն ու Իսրայելը հրադադարի վերաբերյալ համաձայնության են հասել

Իսրայելի և Պաղեստինի ներկայացուցիչները պայմանավորվել են կրակի դադարեցման շուրջ իսրայելցի զինվորականների կողմից Գազայի հատվածին հարվածելուց հետո։ Այս մասին հայտնում է Reuters-ը։

Գործակալության տվյալներով՝ պայմանավորվածության հասնելուն օգնել է Եգիպտոսը։ Այսպիսով՝ կողմերը պայմանավորվել են վերջ դնել բռնությանը։

Մայիսի 5-ի առավոտյան իսրայելական ԶԼՄ-ները հայտնել էին Գազայի հատվածից իսրայելական տարածքի ուղղությամբ արձակված 430 հրթիռի մասին։ Ի պատասխան՝ իսրայելական բանակը հարձակվել է պաղեստինցիների 200 թիրախների վրա։

Նշվում է, որ մայիսի 5-ին Իսրայելի հրթիռակոծման հետևանքով սպանվել է ՀԱՄԱՍ-ի հրամանատարներից մեկը՝ Համեդ Ահմեդ Աբեդ Հուդրին։ Հրթիռն ընկել է նրա մեքենայի վրա։