ԱՄՆ-ն անցնում է չափը. Չավուշօղլու

Թուրքիայի արտաքին գործերի նախարար Մևլութ Չավուշօղլուն Տաջիկստանի գործընկեր Սիրոժիդին Մուհրիդդինի հետ հանդիպման ժամանակ անդրադարձել է  ԱՄՆ պետքարտուղար Մայք Պոմպեոյի հայտարարությանը: Նա նշել է, որ Թուրքիան ի սկզբանե ունեցել է հստակ դիրքորոշում Իրանի նկատմամբ պատժամիջոցների կիրառման վերաբերյալ` դա համարելով սխալ քայլ:

«Այս պատժամիջոցները վնասում են իրանցի ժողովրդին, իսկ մյուս կողմից` տարածաշրջանում լարվածություն առաջացնում: Դրանք ծայրաստիճան վտանգավոր քայլեր են: Մենք դեմ ենք նման մոտեցումներին: ԻՊ-ի կողմից վնաս է հասցվել Իրաքից եկող գազամուղներին: Դրանք վերանորոգելու համար ժամանակ է պետք: Այժմ ԱՄՆ-ն միակողմանի որոշում է կայացնելու և բոլոր երկրներին ասելու է` դրա տակից ինքներդ դուրս եկեք: Բացի այդ` Իրանի փոխարեն ասել, թե որ երկրներից է պետք նավթ գնել, նշանակում է, որ նրանք անցնում են չափը: Այդ դո՞ւ ես այլ երկրների անունից բանակցում»,- Չավուշօղլուի խոսքերն է մեջբերում «Անադոլու» գործակալությունը: