Հայոց ցեղասպանության ճանաչման հարցը, կարծես, տեղափոխվում է մահմեդական աշխարհ. Սաֆրաստյան

«Սովորաբար, այդ ակտիվությունն ակնհայտ է լինում այն պարագայում, երբ տվյալ երկրի ու Թուրքիայի հետ հարաբերություններում վատ հանգրվան է: Մյուս կողմից` չպետք է անտեսել այն փաստը, որ Հայոց ցեղասպանության ճանաչման գործընթացը ոչ միայն երկկողմանի հարաբերությունների, այլև ցեղասպանությունների կանխարգելման  խնդիր է»,- ասաց նա:

Այս համատեքստում թուրքագետը նշեց, որ վերջին շրջանում Հայոց ցեղասպանության ճանաչման հարցը կարծես թե տեղափոխվում է մահմեդական աշխարհ, և որ դրա մասին է վկայում  արաբական որոշ երկրների կողմից այդ մասին խոսելը: Սաֆրաստյանը հույս հայտնեց, որ մահմեդական աշխարհը վեր կկանգնի Թուրքիայի հետ կրոնական ընդհանրության գաղափարից և իսկապես կանդրադառնա այդ ծանրագույն հանցագործությանը՝ ուղղված մարդկության դեմ:

Ինչպիսի՞ն պետք է լինի Հայաստանի, հայ ժողովրդի մարտավարությունը: Ռուբեն Սաֆրաստյանն ասաց, որ պետք է ավելի հետևողական և հիմնավոր դրվի փոխհատուցման խնդիրը: «Ցեղասպանությունը ծանրագույն հանցագործություն է, և հանցագործը պետք է պատիժ ստանա: Դա ներկայում հնարավոր է իրականացնել հատուցում պահանջելու միջոցով: Նախ` պետք է ամենայն մանրամասնությամբ ուսումնասիրվեն բոլոր իրավական հարցերը, ճիշտ ընտրվի հարմար քաղաքական պահը և առաջ տարվի փոխհատուցման հարցը»,- հավելեց թուրքագետը: