Կխնդրեի` այս հարցում այլ շահարկումներ չլինեն. ԱԳՆ խոսնակը՝ Դանիայի դեսպանատան փակման մասին

Բազմիցս ասվել է, որ դիվանագիտական ծառայության արդյունավետության բարձրացման նպատակով որոշակի բարեփոխումներ են իրականացվում, ինչը ենթադրում է դիվանագիտական ներկայացուցչությունների օպտիմալացում. այսօր լրագրողներին ասաց ԱԳՆ խոսնակ Աննա Նաղդալյանը՝ անդրադառնալով Դանիայում ՀՀ դեսպանատան փակման մասին լուրերին:

Հիշեցնենք, որ մամուլում հրապարակումներ եղան, որ Հայաստանի կառավարությունը մտադիր է ֆինանսական միջոցների խնայողության շրջանակում փակել Դանիայում Հայաստանի դեսպանատունը եւ այն միավորել Շվեդիայում մեր դեսպանատանը, և որ Շվեդիայում ՀՀ դեսպանատունը միաժամանակ կսպասարկի Դանիան, Շվեդիան, Ֆինլանդիան, Նորվեգիան և Իսլանդիան:

«Դիվանագիտական ծառայության արդյունավետության բարձրացման ուղղությամբ տարվող աշխատանքների շրջանակում նախատեսված են նաև այնպիսի քայլեր, որոնք հետագայում նպաստելու են ՀՀ դիվանագիտական ներկայացվածության աշխարհագրության ընդլայնմանը: Ուստի կխնդրեի այս հարցում այլ շահարկումներ չլինեն»,- ասաց ԱԳՆ մամուլի խոսնակը: