Իրանահայ գործարար Լևոն Ահարոնյանն «Ամին օլ Զարբ» բարձրագույն շքանշանի է արժանացել

Աղբյուրը՝ Alikonline

Իրանահայ ճանաչված գործարար Լևոն Ահարոնյանն «Ամին օլ Զարբ» բարձրագույն շքանշանի է արժանացել:

Երեկ Իրանի Իսլամական Հանրապետության նախագահի առաջին տեղակալ Էսհաղ Ջահանգիրիի ներկայությամբ կայացել է «Ամին օլ Զարբ» բարձրագույն շքանշանի 3-րդ շրջանի հանդիսավոր արարողությունը:

«Ամին օլ Զարբ» գործարար բարձարագույն շքանշանի են արժանացել իրանցի 8 ճանաչված գործարարներ, որոնց թվում է եղել նաև իրանահայ ճանաչված գործարար, Իրանի տրանսպորտի եւ տարանցիկ բեռնափոխադրման առաջատարներից մեկի՝ «Սաթի» ընկերության հիմնադիր եւ սեփականատեր Լևոն Ահարոնյանը:

Արարողության ժամանակ ելույթով հանդես է եկել Իրանի Հանրապետության նախագահի առաջին տեղակալ Էսհաղ Ջահանգիրին: Ընդգծելով ներկայիս պայմաններում երկրի տնտեսության կենսունակության ապահովման համար արտահանման կարևորությունը` Ջահանգիրին հատուկ անդրադարձել է այդ ասպարեզում իրանահայ գործարարների դերակատարությանն ու մատուցած ծառայություններին:

Նշենք, որ Լևոն Ահարոնյանն ակտիվ դերակատարություն է ունեցել իրանահայության ազգային-հասարակական կյանքում: Վաստակավոր գործարարը համարվում է Իրան-Հայաստան առեւտրի պալատի հիմնադիրն ու երկու երկրների միջև չվերթերի հաստատման նախաձեռնողը: