Այս ընտրությունները պիտի լինեն ապագայի համար. ՀՀ նախագահ

ՀՀ նախագահ Արմեն Սարգսյանը քաղաքացիական իր պարտքը կատարելու էր եկել Երևան քաղաքի  թիվ 9/59  ընտրատեղամասում, որը տեղակայված է Գրողների միության շենքում: Լրագրողներին տեսնելով` նախագահը նա կատակեց` բոլորդ այստե՞ղ եք ընտրելու, այնուհետև գնաց` քվեարկելու:

Լրագրողների հետ ճեպազրույցում Արմեն Սարգսյանը նախ անգլերենով պատասխանեց օտարերկրյա լրատվամիջոցներից մեկի հարցին՝ նշելով, որ սա Հայաստանի  համար կարևոր օր է:

Նա հայաստանյան լրագրողներին վստահեցրեց, որ նույնը կասի նաև հայերենով: «Ո՞ր բարբառով եք ուզում, Գյումրվա՞»,- կատակեց նախագահը: Լրագրողներից մեկն արձագանքեց՝  Լոռվա: «Դե Լոռվա բարբառը շատ պարզ է՝ անձրև է գալիս»,- կրկին կատակով արձագանքեց Արմեն Սարգսյանը, ապա պարզաբանեց, թե  ինչու է կարևոր օր համարում դեկտեմբերի 9-ը՝ շնորհավորելով  ՀՀ բոլոր քաղաքացիներին:

«Ընտրությունների օր է, ժողովուրդն իր կամքը պետք է արտահայտի, սա ժողովրդի, մեր կարևորագույն  իրավունքն է, հետևաբար՝ տոն է: Եվ ես հույս ունեմ, որ մեզանից յուրաքանչյուրն այդ տոնը կնշի` իր պարտականությունը կատարելով, այն է՝ գնալով իր ընտրատեղամաս և ընտրելով:  Ընդ որում՝ ընտրելով ազատ, անկաշկանդ՝ անկախ նրանից, թե ում է իր ձայնը տալու: Ես հույս ունեմ, որ այս ընտրությունները կլինեն ազատ և արդար:  Այս ընտրությունները պիտի լինեն ապագայի համար, յուրաքանչյուր ընտրող  պետք է դատի իր խղճով, մտածի իր ընտանիքի, իր երեխայի մասին և այն պատասխանատվության,  որ կրում է, որովհետև պատասխանատվություն մեր երկրի ապագայի համար կրում են բոլորը՝ և' նախագահը, և' վարչապետը, և' ԱԺ-ն, և' ԱԺ-ի նախագահը, և' նախարարները, բայց նախևառաջ` յուրաքանչյուր քաղաքացի: Սա յուրաքանչյուր քաղաքացու համար իր պարտականությունը և պատասխանատվությունը ցուցադրելու պահն է:  Մաղթում եմ, որ մեր ընտրությունները լինեն իսկապես ազատ և արդար»,- նշեց Արմեն Սարգսյանը:

Նա չմեկնաբանեց ՀՀ երկրորդ նախագահ Ռոբերտ Քոչարյանի կալանավորումը:

Հավելենք, որ ՀՀ նախագահը թիվ 9/59 ընտրատեղամաս էր եկել տիկնոջ՝ Նունե Սարգսյանի հետ, որը, սակայն, այլ ընտրատեղամասում էր քաղաքացիական իր պարտքը կատարելու: