Հունաստանը կմնա եվրագոտում` անկախ հանրաքվեի արդյունքներից

Հունաստանը կմնա եվրագոտում` անկախ հակաճգնաժամային հանրաքվեի արդյունքներից. այսօր հայտարարել է երկրի ֆինանսների նախարար Եվանգելոս Վենիզելոսը:

«Հունաստանի դիրքորոշումը եվրագոտու հարցում պատմական նվաճում է եւ չի կարող կասկածի տակ դրվել: Այն չի կարող կախված լինել հանրաքվեից»,- ասել է նա:

Երեկ Հունաստանի կառավարությունը միաձայն հավանություն էր տվել վարչապետ Գեորգիոս Պապանդրեուի` ԵՄ-ի հակաճգնաժամային միջոցառումների մասին հանրաքվե անցկացնելու առաջարկին: Այն հավանորեն կանցկացվի դեկտեմբերի 4-ին: Երկրի բնակիչները պետք է իրենց կարծիքը հայտնեն կոշտ տնտեսական քաղաքականության վերաբերյալ, որը ԵՄ-ի պայմանն է` Հունաստանի բազմամիլիոն պարտքը փակելու դիմաց: