ՀՀԿ-ի մոտեցումը արտահերթ խորհրդարանական ընտրությունների անցկացման վերաբերյալ ոչ կառուցողական է. Փաշինյան

Սրճարանում Նիկոլ Փաշինյանի ու ՀՀԿ խմբակցության ղեկավար Վահրամ Բաղդասարյանի միջև հանդիպումն ավարտվեց, որից հետո լրագրողների հետ զրույցում Փաշինյանը խոսեց արդյունքների մասին:

Փաշինյանը նշեց, որ արտահերթ խորհրդարանական ընտրություններ անցկացնելու թեմայով սա առաջին հանդիպումն էր, և միայն մեկ հանդիպումով որոշումներ, բնականաբար, չեն կայացվի: Նա կոռեկտ չհամարեց վաղաժամ կարծիք հայտնել, թե ՀՀԿ-ն դեմ կլինի արտահերթ խորհրդարանական ընտրությունների ացնկացմանը, թեև նշեց, որ հանրապետականների հրապարակային հայտարարությունները այն մասին են, որ ԱԺ ընտրությունները պետք է լինեն 2022թ-ին, ինչը, ըստ Փաշինյանի, ոչ կառուցողական մոտեցում է:

«Մենք մտքեր փոխանակեցինք թեմայի վերաբերյալ և պայմանավորվեցինք բանակցային գործընթաց սկսել: Ես կարծում եմ, որ արտահերթ խորհրդարանական ընտրությունները պետք է տեղի ունենան հնարավորինս արագ, ասենք օրինակ, երկու-երեք ամսվա ընթացքում: Մինչև ԱԺ արտահերթ ընտրությունների հարցը չլուծվի, երկրում ոչ մի հարց չի լուծվելու, որովհետև բոլորը շունչները պահած սպասում են արտահերթ խորհրդարանական ընտրություններին: Եթե որևէ քաղաքական ուժ դիմադրում է սրան, նշանակում է, որ ցանկանում է` ժողովուրդը շունչը պահած այդպես էլ մնա: Դա սխալ ընտրություն է»,-ասաց Փաշինյանը:

Ինչ վերաբերում է մամուլում արծարծվող մտահոգությանը, թե արտահերթ խորհրդարանական ընտրություններում կարող է գրանցվել նույն արդյունքը, ինչ Երևանի ավագանու ընտրություններին, երբ ՔՊ-ն 82 տոկոս ձայն հավաքեց, Փաշինյանը նշեց. «Այդպիսի բան չի կարող լինել, քանի որ գործող Սահմանադրությամբ ԱԺ-ի առնվազն մեկ երրորդը պետք է լինի ընդդիմադիր: Այսօր գործող կարգավորումները արդեն իսկ երաշխավորում են ԱԺ-ի մեկ երրորդի ընդդիմադիր լինելը: Մենք կարող ենք ունենալ ԱԺ-ում լեգիտիմ մեծամասնություն և լեգիտիմ փոքրամասնություն»:

Նա հավելեց, որ արտահերթ խորհրդարանական ընտրություններ անցկացնելու թեմայով շարունակելու է հանդիպել խորհրդարանական բոլոր քաղաքական ուժերի հետ,  նաև հանդիպելու է արտախորհրդարանական քաղաքական ուժերի հետ: