Հայաստանից ավելի շատ գնացել են, թե եկել. Փաշինյանը կրկին անդրադաձավ խնդրին

Այսօր վարչապետ Նիկոլ Փաշինյանը իր ֆեյսբուքյան ուղերձում անդրադարձավ Հայաստանի մեկնածների ու ժամանածների թեմային: Նշենք, որ օրեր առաջ Հանրապետության հրապարակում հրավիրած հանրահավաքում Փաշինյանը հայտարարել էր. «…Իմ վարչապետ ընտրվելուց հետո, սիրելի ժողովուրդ, ամենակարևոր արդյունքը՝ Հայաստանի Հանրապետություն ավելի շատ գալիս են, քան Հայաստանի Հանրապետությունից հեռանում են, ինչը, կարելի է ասել, համարել արտագաղթի կանխման առաջին և շատ կարևոր փուլ։ Այս տարվա մայիսի 10-ից օգոստոսի 14-ը ընկած ժամանակահատվածում Հայաստանի Հանրապետություն ժամանել է 29986-ով ավելի շատ մարդ քան մեկնել է։ Նախորդ տարվա նույն ժամանակահատվածում մեկնածների թիվը եկածներից ավել էր 6000-ով, շուրջ 6000-ով։ Այս տարի եկածների թիվը ավել է 29986-ով։ Վերջին 3 ամսում Հայաստան է եկել նախորդ տարվա նույն ժամանակահատվածի հետ համեմատ 34000-ով ավելի օտարերկրացի»։

Վերլուծաբան Արմեն Մինասյանը ներկայացրել էր  վերլուծություն այն մասին, որ ՀՀ պաշտոնական վիճակագրության համաձայն` 2018 թվականի առաջին կիսամյակում իրականում Հայաստանից մեկնել է 50 796-ով (հիսուն հազար յոթ հարյուր իննսունվեց) ավել ՀՀ քաղաքացի, քան վերադարձել է:

Վերլուծաբանը նշում է, որ Փաշինյանը մի կողմից յուրացնում է տուրիզմի ու ավիափոխադրումների ոլորտում Կարեն Կարապետյանի կառավարության գրանցած հաջողությունները, իսկ մյուս կողմից՝ երկիր ժամանած զբոսաշրջիկների քանակը մանիպուլացնելով փորձում է թաքցնել արտագաղթի փաստը:

Այսօր Փաշինյանը իր ֆեյսբուքյան ուղիղ եթերում անդրադարձավ այս թեմային:

«Մեկ-երկու մեկնաբանություն տեսա, որտեղ հեղինակները փորձում էին որևէ կերպ վիճարկել իմ հրապարակած մեկնածների ու ժամանածների թիվը: Ես ուզում եմ ասել, որ անհնար է այդ թիվը վիճարկել: Մայիսի 10-ից օգոստոսի 14-ը նախորդ տարվա համեմատությամբ մեկնածների ու ժամանածների տարբերության թվով պլյուս  6000 է»,- ասաց Փաշինյանը` նաև դրանով բացատրելով անշարժ գույքի գների բարձրացումը: