Ուսանողների ծնողները շատ շուտով բախվելու են այս խնդրին․ Թադեւոս Ավետիսյան

«Եթե երկու աշխատող ծնողները վճարել են իրենց ուսանող զավակի ուսման վարձը՝ 400 հազար դրամ, 200 հազար դրամը կարող են ետ ստանալ»,- ֆեյսբուքյան իր էջում գրել է ՀՀ վարչապետ Նիկոլ Փաշինյանը՝ կցելով տեսանյութ: «Տարեկան հայտարարագիրը լրացնելուց հետո հայտարարագրման արդյունքում կրթության համար նախատեսված է վերադարձնել յուրաքանչյուր աշխատողի հաշվով 100 հազար դրամ, առողջապահության ապահովագրության համար՝ մինչեւ 50 հազար դրամ, բայց երկուսը միասին ոչ ավելի, քան 100 հազար դրամ: Այս վերադարձը տեղի է ունենալու աշխատող քաղաքացիների վճարած եկամտային հարկերից»,- նշել է Փաշինյանը: 

Ֆեյսբուքյան օգտատերերը Փաշինյանի հայտարարություններին ու խոստումներին սկսել են խիստ թերահավատորեն մոտենալ: Նրանք մասնավորապես գրում են, որ Փաշինյանը հերթական անգամ խաբում է իրենց, որ նման բան չկա եւ այլն: ԱԺ «Հայաստան» խմբակցության պատգամավոր, տնտեսագետ Թադեւոս Ավետիսյանը, «Հրապարակի» հետ զրույցում անդրադառնալով Նիկոլ Փաշինյանի հետեւյալ խոստմանը, ասաց. «Այս պահի դրությամբ սոցիալական ծախսերի փոխհատուցման գործիքը, եկամուտների համընդհանուր հայտարարագրման հարթակը չի գործում առհասարակ, ակտիվ չէ: Ես օրեր առաջ ինքս ճշտեցի թեժ գծից, ասացին, որ այս պահի դրությամբ համակարգը ներդրված չէ, ընթացքի մեջ է, բայց թե երբ կներդրվի այն եւ ինչ ընթացքով, պարզ չէ: Այս պահի դրությամբ փաստացի համակարգը չի աշխատում: Սա` մեկ, երկրորդ կարեւոր կետը, որ կցանկանայի կարեւորել, այն է, որ այդ կարգավորումն աբսուրդ է` ի վնաս քաղաքացիների: Եթե եկամտահարկի հայտարարագիր ներկայացնող քաղաքացին ուսման վարձը մուտք է արել իր չաշխատող ուսանող երեխայի անունով, փաստացի չի կարողանալու որեւէ փոխհատուցում ստանալ: Ակնհայտ է, որ ուսանողներից շատերին ծնողը տալիս է վարձը վճարելու գումարը, եւ երեխան ինքն է գումարը տանում բանկ ու վճարում: Որպես կանոն, այդպես է, ես էլ եմ իմ երեխային գումար տալիս, որ նա տանի բանկ ու վճարում կատարի: Այս պարագայում փոխհատուցումը մերժվում է: Շատ ու շատ քաղաքացիներ շուտով այս խնդրին են բախվելու: Շատերը չգիտեն, որ նման խնդիր է առաջանալու, բայց ՊԵԿ-ը եւ ուսումնական հաստատությունները գիտեն, թե ինչ է կատարվում: Կարգավորումն այնպիսին է, որ մեծ մասը չի ստանալու փոխհատուցում, որովհետեւ նախորդ տարի չի ստացել առնետային սահմանափակումը: Օրական մի բան հնչեցնում են այս իշխանությունները, որոնք հիմնականում մանիպուլյատիվ բնույթի են, պարզվում է՝ տեխնիկական խնդիրներ կան, կամ բովանդակային առումով թերացումներ կան եւ այլն: Որոշումն ասում է, որ եթե ուսանողի ծնողները վճարում են գումար` ուսման վարձի համար, յուրաքանչյուրի սահմանաչափը 100 հազար դրամ է: Այսինքն` ամեն մեկը 100 հազար դրամ կարող է ստանալ, միասին` 200 հազար դրամ: Տրամաբանությունը սա է: Մյուս կարեւոր աբսուրդն էլ այն է, որ սոցիալական ծախսը ոչ մի կապ չունի եկամուտների հայտարարագրման գործիքի հետ: Այդ պրոցեսներն իրար կապել են արհեստականորեն: Իբրեւ արտոնություն են տալիս, որ մարդիկ հայտարարագիր լրացնեն, բայց իրականում բովանդակային առումով ոչ մի կապ չկա այդ երկու պրոցեսի միջեւ: Որպես օրինակ` հիպոթեքային վարկի եկամտահարկի միջոցով տոկոսների վերադարձը կարող ենք նշել, այն տարիներ շարունակ գործում է: Եթե պետությունն ունի նման կամք, ցանկություն, առանց եկամուտների հայտարարագրի էլ կարող է աջակցել իր քաղաքացիներին: Սա զուտ արվում է արհեստական կապ ստեղծելու համար, որպեսզի քաղաքացիները լրացնեն այդ աննպատակ հայտարարագիրը»: